मुंबई : राज्यातील जमिनीच्या बिगरशेती वापरासाठी आवश्यक असलेल्या अकृषिक (एनए) रूपांतरण प्रक्रियेला अधिक सुलभ आणि पारदर्शक बनवण्यासाठी महत्त्वाचे पाऊल उचलण्यात आले आहे. इमारत परवानगी व्यवस्थापन प्रणाली (बीपीएमएस) या ऑनलाइन प्रणालीतून रूपांतरण अधिमूल्य भरण्याची सुविधा आजपासून सुरू करण्यात आली आहे.
या नव्या सुविधेचे उद्घाटन महसूल मंत्री चंद्रशेखर बावनकुळे यांच्या हस्ते करण्यात आले. या प्रणालीमुळे नागरिकांना आता एका क्लिकवर ऑनलाइन पद्धतीने अकृषिक रूपांतरण अधिमूल्य भरता येणार आहे. विशेष म्हणजे, या व्यवहाराची नोंद थेट ७/१२ उताऱ्यावर होणार असल्याने प्रक्रियेत पारदर्शकता वाढणार आहे.महाराष्ट्र जमीन महसूल संहितेत करण्यात आलेल्या सुधारणेनुसार जमिनीच्या अकृषिक वापराबाबत शासन निर्णय घेण्यात आला होता. या निर्णयाची प्रभावी अंमलबजावणी करण्यासाठी बिल्डिंग परमिशन मॅनेजमेंट सिस्टम ही प्रणाली सुरू करण्यात आली आहे.
या सुविधेमुळे नागरिकांना विकास परवानगी किंवा बांधकाम आराखडे मंजूर करून घेतानाच एकरकमी रूपांतरण अधिमूल्य भरता येणार आहे. त्यामुळे विविध विभागांत फेरफटका मारण्याची गरज कमी होऊन सर्व प्रक्रिया एकाच व्यासपीठावर पूर्ण होणार आहे.महसूलमंत्री बावनकुळे यांनी सांगितले की, बीपीएमएसच्या धर्तीवरच ऑटो डीसीआर प्रणालीतही आवश्यक सुधारणा करण्याचे काम सुरू असून पुढील दहा दिवसांत ते पूर्ण केले जाईल.या निर्णयामुळे राज्यातील जमीन व्यवहार अधिक वेगवान, सुलभ आणि पारदर्शक होण्याची अपेक्षा व्यक्त केली जात आहे.
