चेन्नई सुपर किंग्स साठी इंडियन प्रीमियर लीग २०२६ हंगाम आव्हानात्मक ठरत आहे. आतापर्यंत खेळलेल्या ६ सामन्यांपैकी ४ सामन्यांत पराभव पत्करल्याने संघावर दबाव वाढला आहे. त्यातच आता दुखापतींमुळे संघाची चिंता आणखी वाढली आहे. वेगवान गोलंदाज खलील अहमद मांडीच्या दुखापतीमुळे स्पर्धेबाहेर गेला आहे. कर्णधार एम एस धोनी अजूनही पोटरीच्या दुखापतीतून सावरत असून या हंगामात तो मैदानात उतरलेला नाही. आता युवा फलंदाज आयुष म्हात्रे हाही उर्वरित हंगामातून बाहेर झाला आहे.
१८ एप्रिल रोजी हैदराबाद विरुद्धच्या सामन्यात फलंदाजी करताना आयुषला डाव्या मांडीमागील स्नायूची दुखापत झाली. या दुखापतीतून पूर्णपणे सावरण्यासाठी त्याला साधारण ६ ते १२ आठवड्यांचा कालावधी लागणार आहे. आयुष म्हात्रेने या हंगामात उत्कृष्ट कामगिरी करत ६ सामन्यांत २ अर्धशतकांसह २०१ धावा केल्या होत्या. त्यामुळे त्याची अनुपस्थिती हा संघासाठी मोठा धक्का मानला जात आहे. दरम्यान, चेन्नईने अद्याप दुखापतग्रस्त खेळाडूंच्या बदली खेळाडूंची घोषणा केलेली नाही. संभाव्य पर्याय म्हणून आकाश माधवळ आणि राजवर्धन हंगारगेकर यांची नावे चर्चेत आहेत.
संघासाठी दिलासा देणारी बाब म्हणजे ऑस्ट्रेलियाचा वेगवान गोलंदाज स्पेंसर जॉन्सन संघात दाखल झाला आहे. नॅथन एलिस दुखापतीमुळे बाहेर गेल्यानंतर त्याची बदली म्हणून त्याची निवड करण्यात आली होती.
आता चेन्नई सुपर किंग्स चा पुढील सामना मुंबई इंडियन्स विरुद्ध २३ एप्रिल रोजी वानखेडे स्टेडियम येथे होणार आहे. या सामन्यात आयुष म्हात्रेच्या जागी कोणाला संधी मिळते, याकडे सर्वांचे लक्ष लागले आहे.
