उल्हासनगर : उल्हासनगर येथील शासकीय मध्यवर्ती रुग्णालय प्रशासनाने परिसरातील नशापदार्थांचा सुळसुळाट रोखण्यासाठी अंमलात आणलेली कठोर मोहीम आता प्रभावी ठरत आहे. गुटखा, तंबाखू, बीडी, सिगारेटपासून अगदी दारूपर्यंत कोणताही मादक पदार्थ रुग्णालयात आणण्यास सक्त मनाई असून सुरक्षा कर्मचाऱ्यांच्या 24 तास गस्तीमुळे अनेकांना नशापदार्थ लपवून आणताना रंगेहाथ पकडण्यात आले आहे.
सुरक्षा रक्षकांच्या सतर्कतेमुळे काही रुग्णांच्या नातेवाईकांनी औषधांच्या पाकिटांत दारू लपवण्याचा प्रयत्न केल्याचे उघड झाले. तर काहींनी गुटखा व तंबाखू तोंडात लपवून आत प्रवेश करण्याचा प्रयत्न केला. गेल्या काही दिवसांत अनेक अशा प्रकारांचा पर्दाफाश करण्यात आला असून काहींना इशारा देऊन सोडण्यात आले, तर काहींकडून दंडात्मक कारवाईसाठी अहवाल तयार करण्यात आला आहे.
रुग्णालय प्रशासनानुसार, परिसरात कोणत्याही प्रकारचे मादक पदार्थ बाळगणे, सेवन करणे किंवा आतमध्ये आणणे यावर पूर्ण बंदी आहे. नियमांचे उल्लंघन करणाऱ्यांवर पोलिसांमार्फत थेट कारवाई केली जाणार असल्याचा इशारा प्रशासनाने दिला आहे. वाढलेल्या गस्त आणि कडक तपासणीमुळे रुग्णालय परिसरात शिस्त, स्वच्छता आणि आरोग्यदायी वातावरण निर्माण झाले आहे. नागरिकांकडून या मोहिमेला सकारात्मक प्रतिसाद मिळत असून रुग्णालय म्हणजे आरोग्याचे मंदिर ही जाणीव अधिक दृढ होत आहे.
रुग्णालयाचे अधीक्षक डॉ. मनोहर बनसोडे यांनी सांगितले, “रुग्णालयात येणारा प्रत्येक नागरिक उपचारासाठी येतो, नशेसाठी नाही. परिसरात नशापदार्थ आढळल्यास कोणतीही ढिलाई न देता तत्काळ पोलिस कारवाई केली जाईल. ही मोहीम पुढेही अधिक कडकपणे सुरू ठेवून समाजाला नशामुक्तीचा ठोस संदेश देण्याचा आमचा निर्धार आहे.”
