बदलापूर: बदलापूर रेल्वे स्थानकावर प्रवाशांच्या सुरक्षितता आणि सुविधांमध्ये मोठी सुधारणा घडवून आणणारी महत्त्वाची कामे वेगाने सुरू असून, मुंबई रेल्वे विकास महामंडळाने (एमआरव्हीसी) उन्नत डेकच्या कामात महत्त्वाचा टप्पा यशस्वीरीत्या पूर्ण केला आहे.
१३ व १४ डिसेंबर २०२५ रोजी मध्यरात्री १२ ते सकाळी ६ या सहा तासांच्या नाईट ब्लॉकदरम्यान उर्वरित १७ गर्डर, त्यामध्ये प्रमुख क्रॉस गर्डरचाही समावेश, सुरक्षितपणे बसवण्यात आले. सुमारे ४० कर्मचाऱ्यांच्या पथकाने १५० टन क्षमतेचा एक मोठा क्रेन तसेच १५ टन क्षमतेचे दोन फराणा क्रेन वापरून, अत्यंत गर्दीच्या परिसरात हे काम कोणताही अपघात न होता पूर्ण केले.
दरम्यान, बदलापूर स्थानकावरील प्रवासी सुविधांचा टप्प्याटप्प्याने विकास सुरू आहे. प्लॅटफॉर्म क्रमांक १ वर चार जिने आणि एक एस्केलेटर प्रवाशांसाठी खुले करण्यात आले असून, पुढील काही महिन्यांत येथे एक लिफ्ट आणि आणखी एक एस्केलेटर बसवण्यात येणार आहे. प्लॅटफॉर्म क्रमांक २ वर तीन जिने आणि दोन एस्केलेटर सुरू असून, येत्या तीन महिन्यांत एक लिफ्ट व एक अतिरिक्त जिना उपलब्ध होणार आहे. तसेच प्लॅटफॉर्म क्रमांक ३ वर सध्या तीन जिने कार्यरत असून, पुढील ३० ते ४० दिवसांत दोन एस्केलेटर सुरू करण्यात येणार आहेत.
याशिवाय, प्लॅटफॉर्म क्रमांक १ च्या कल्याण टोकाला नवीन तिकीट कार्यालय व सार्वजनिक शौचालयाचे काम सुरू असून, ते सहा ते सात महिन्यांत पूर्ण होण्याची अपेक्षा आहे. कल्याण टोकाला पूर्व व पश्चिम बाजूच्या स्कायवॉकला जोडणारा ६ मीटर रुंदीचा आणखी एक पादचारी पूल उभारण्याचाही प्रस्ताव आहे.
पूर्व बाजूला नवीन स्कायवॉक, उन्नत तिकीट कार्यालय, आधुनिक स्थानक इमारत तसेच सर्क्युलेटिंग एरिया उभारण्याचे नियोजन करण्यात आले आहे. सध्या सुरू असलेली बहुतांश कामे पुढील पाच ते सहा महिन्यांत पूर्ण होणार असून, बदलापूर–कल्याण मार्गावरील तिसरी व चौथी रेल्वे मार्गिका सुरू होताच त्यासंदर्भातील उर्वरित कामे एकत्रितपणे पूर्ण केली जाणार आहेत.
या सर्व विकासकामांमुळे बदलापूर स्थानकावरून प्रवास करणाऱ्या हजारो प्रवाशांना अधिक सुरक्षित, सोयीस्कर आणि वेगवान प्रवासाचा लाभ मिळणार असल्याचे चित्र आहे.
