बदलापूर : चुलीवरचे जेवण मिळेल, अशा पाट्या लावून अनेक हॉटेल व ढाबेवाले आपल्या व्यवसायाची जाहिरात करताना पाहायला मिळायचे. चुलीवरचे या अन्न पदार्थांचा आस्वाद घेण्यासाठी ग्राहकही आवर्जून अशा हॉटेल वा ढाब्यावर जायचे, परंतु कमर्शियल गॅस सिलिंडरच्या तुटवड्यामुळे आता बदलापूरकरांना चहाही चुलीवरचाच प्यावा लागत आहे.
सुमारे आठवड्याभरापूर्वी आमदार किसन कथोरे व नगराध्यक्ष रुचिता घोरपडे यांच्या प्रमुख उपस्थितीत कुळगाव बदलापूर नगर परिषदेत पार पडलेल्या आढावा बैठकीत बदलापुरात गॅस टंचाई नसल्याचा दावा प्रशासनाकडून करण्यात आला होता. कमर्शियल गॅस सिलेंडरचा ७० टक्के पुरवठा होणार असल्याचेही स्पष्ट करण्यात आले होते. परंतु दुसरीकडे हॉटेल, धाबे, खानावळ,मिठाई तयार करणारे मिठाईवाले तसेच विविध प्रकारचे खाद्यपदार्थ विक्री स्टॉल चालवणारे मात्र कमर्शियल गॅस उपलब्ध होत नसल्याची ओरड करीत आहेत. त्यापैकी अनेकांनी लाकडाच्या पारंपरिक चुली वापरण्यास सुरुवात केली आहे. अगदी चहावाल्यांनाही चूल मांडून लाकडावर चहा तयार करावा लागतो आहे. तर काहीना हे शक्य होत नसल्याने त्यांना इलेक्ट्रिक शेगडीवर वेळ मारून न्यावी लागत आहे. बदलापूर पूर्व भागात स्टेशनजवळ रिक्षा स्टैंड शेजारी असलेल्या एका चहा विक्रेत्याने तीन विटा रचून चूल तयार केली असून लाकडावर चहा तसेच त्यांच्या कर्मचायांसाठी लागणारा स्वयंपाक करण्यास सुरुवात केली आहे. तर कात्रप भागात नगरसेवक संभाजी शिंदे यांच्या कार्यालयासमोर असलेल्या चहावाल्याला चूल मांडणे शक्य होत असल्याने त्याने इलेक्ट्रिक शेगडीवर चहा करण्यास सुरुवात केली आहे.
चहाचे ग्राहक दररोज चहासाठी दुकानात येत असतात वा ऑफिसमध्ये, दुकानात चहा मागवत असतात. गॅस सिलेंडर तुटवड्यामुळे दुकान बंद ठेवले तर या ग्राहकांची गैरसोय होईल. त्यामुळे ग्राहक तुटण्याचा धोका असून तसे झाल्यास मोठे नुकसान सहन करावे लागेल. आमच्याप्रमाणे दुकानातील कामगारांचीही रोजीरोटी अवलंबून आहे. त्यामुळे परिस्थितीचा सामना करीत व्यवसायात टिकून राहण्यासाठी आम्हाला गॅस सिलेंडरला पर्याय म्हणून चूल आणि इलेक्ट्रिक शेगडीसारख्या पर्यायांचा वापर करावा लागत असल्याचे चहा विक्रेत्यांचे म्हणणे आहे.
