प्रारूप मतदार यादी हरकतींचा पाऊस
बदलापूर : कुळगाव बदलापूर नगरपालिका सार्वत्रिक निवडणूक करिता 8 ऑक्टोबर रोजी प्रारूप मतदार यादी प्रसिद्ध झाली आहे. प्रारूप यादी प्रसिद्ध झाल्यानंतर इच्छुक उमेदवारांची अक्षरशः झोप उडाली आहे. मतदार यादी संदर्भात आतापर्यंत नगरपालिका प्रशासनाकडे 5300 हून जास्त हरकती प्राप्त झाल्याची खात्रीदायक सूत्रांकडून माहिती मिळत आहे.
प्रत्येक निवडणुकीत मतदार यादी हा अत्यंत महत्त्वाचा भाग असतो. योग्य मतदारांची उपस्थिती आणि नोंदणी ही निवडणुकीच्या पारदर्शकतेसाठी अत्यावश्यक आहे. मात्र यंदा प्रसिद्ध झालेल्या प्रारूप यादीत अनेक मतदारांची नावे वगळण्यात आली आहेत, काहींचे पत्ते चुकीचे नोंदवले गेले आहेत, तर काही मतदारांचे पुनरावृत्त नोंद आढळून आली आहे. मतदार यादीत हरकत घेण्याकरिता मतदारांनी स्वतःहून पुढाकार घेणे गरजेचे असताना मतदार मात्र या संपूर्ण प्रक्रियेत अलिप्त राहत असल्याने इच्छुक उमेदवारांना स्वतःहून अर्ज दाखल करावे लागत आहेत. अर्जासोबत आधार कार्ड देणे गरजेचे असल्याने मतदार मात्र आधार कार्ड देण्यास नकार देत असल्याने इच्छुकांच्या अडचणीत आणखीनच वाढ झाली आहे.
राज्य निवडणूक आयोगाने नगरपालिका निवडणुकीसंदर्भात प्रारूप मतदार यादी प्रसिद्ध केली असून मतदार यादीवर हरकती आणि सूचनांकरिता 13 ऑक्टोबर पर्यंत असलेली मुदत वाढवून 17 ऑक्टोबर पर्यंत करण्यात आली आहे. निवडणूक आयोगाने मुदतवढ दिल्याने इच्छुक उमेदवारांना थोड्याफार प्रमाणात दिलासा मिळणार आहे. आदर्श बदलापूरला सूत्रांकडून प्राप्त झालेल्या माहितीनुसार 13 ऑक्टोबर पर्यंत तब्बल 5300 हून जास्त हरकती नोंदविण्यात आल्याची माहिती आहे. प्रभागनिहाय अंतिम मतदार यादी 31 ऑक्टोबर रोजी प्रसिद्ध केली जाणार आहे.
