बदलापूर:कुळगांव-बदलापूर नगरपालिका निवडणुकीच्या पार्श्वभूमीवर नुकतीच प्रारूप मतदार यादी जाहीर करण्यात आली आहे. ही यादी प्रसिद्ध होताच इच्छुक उमेदवारांनी आपापल्या प्रभागातील मतदारांची नावे तपासण्यास सुरुवात केली. मात्र,यादीतील त्रुटी,गहाळ नावे आणि प्रभागाबाहेरील मतदारांची मतदार यादीत समावेश असेल नावे यामुळे इच्छुक उमेदवारांचे टेन्शन वाढले आहे.
प्रत्येक निवडणुकीत मतदार यादी हा अत्यंत महत्त्वाचा भाग असतो.योग्य मतदारांची उपस्थिती आणि नोंदणी ही निवडणुकीच्या पारदर्शकतेसाठी अत्यावश्यक आहे.मात्र यंदा प्रसिद्ध झालेल्या प्रारूप यादीत अनेक मतदारांची नावे वगळण्यात आली आहेत, काहींचे पत्ते चुकीचे नोंदवले गेले आहेत,तर काही मतदारांचे पुनरावृत्त नोंद आढळून आली आहे.मतदार यादीत हरकत घेण्याकरिता मतदारांनी स्वतःहून पुढाकार घेणे गरजेचे असताना मतदार मात्र या संपूर्ण प्रक्रियेत अलिप्त राहत असल्याने इच्छुक उमेदवारांना स्वतःहून अर्ज दाखल करावे लागत आहेत.अर्जासोबत आधार कार्ड देणे गरजेचे असल्याने मतदार मात्र आधार कार्ड देण्यास नकार देत असल्याने इच्छुकांच्या अडचणीत आणखीनच वाढ झाली आहे.
या यादीत झालेल्या घोळामुळे निवडणुकीसाठी तयारी करत असलेल्या इच्छुक उमेदवारांची चिंता वाढली आहे.इतर प्रभागामधील मतदारांची संख्या जास्त दाखवली गेल्यास प्रचाराची रणनीतीही बदलावी लागू शकते, अशी प्रतिक्रिया काही उमेदवारांनी व्यक्त केली आहे.
या त्रुटींसंदर्भात निवडणूक विभागाकडे तक्रारी दाखल केल्या जात असून, संबंधित यंत्रणांनी तक्रारीची दखल घेऊन सुधारित यादी जाहीर करावी, अशी मागणी नागरिक व उमेदवारांकडून होत आहे.यासाठी 13 ऑक्टोबर हा कालावधी निश्चित करण्यात आला असून, नागरिकांनी वेळेत आपले तपशील तपासून आवश्यक बदल सुचवावेत,असे आवाहन प्रशासनाकडून करण्यात आले आहे.
