बदलापूर : नगरपालिका निवडणुकीकरिता प्रसिद्ध करण्यात आलेल्या प्रारूप मतदार यादीत मोठ्या प्रमाणात अनागोंदी असल्याने इच्छुक उमेदवारांचे टेन्शन वाढले होते. अशा परिस्थितीमध्ये 13 ऑक्टोबर पर्यंत सूचना व हरकती कशा नोंदविता येतील याबाबत प्रश्न उपस्थित करण्यात येत होते. अशावेळी राज्य निवडणूक आयोगाने या सर्व इच्छुक उमेदवारांना आता दिलासा दिला असून प्रभागनिहाय प्रारूप मतदार यादीवरील हरकती व सूचनांसाठी 17 ऑक्टोबरपर्यंत मुदतवाढ देण्यात आली आहे.
नगरपरिषदा व नगरपंचायत निवडणुकांसाठी प्रभागनिहाय प्रारुप मतदार यादी 8 ऑक्टोबर रोजी प्रसिद्ध करण्यात आली होती. त्यावर आता 13 ऑक्टोबरऐवजी 17 ऑक्टोबरपर्यंत हरकती व सूचना दाखल करता येतील. प्रभागनिहाय अंतिम मतदार यादी 28 ऑक्टोबरऐवजी 31 ऑक्टोबर रोजी प्रसिद्ध केली जाणार आहे.
राज्यातील नगरपरिषदा व नगरपंचायतींच्या सदस्यपदाच्या व थेट अध्यक्षपदाच्या सार्वत्रिक निवडणुकीसाठीच्या प्रभागनिहाय प्रारूप मतदार यादीवरील हरकती व सूचनांसाठी 17 ऑक्टोबरपर्यंत राज्य निवडणूक आयोगाने मुदतवाढ दिली आहे.
