बदलापूर :-नगर परिषदेच्या पुढे ढकलण्यात आलेल्या निवडणुकीच्या सुधारित वेळापत्रकानुसार कुळगाव बदलापूर नगर परिषदेच्या पाच प्रभागातील रखडलेल्या निवडणुकीत फक्त एका भाजप बंडखोर अपक्षाने अर्ज मागे घेतला आहे. बदलापुरातील पाच प्रभागांसाठी येत्या २० डिसेंबर रोजी मतदान संपन्न होईल. तर दुसया दिवशी २१ डिसेंबर रोजी मतमोजणी होणार आहे. उमेदवारांच्या अर्जावर उशिराने झालेली सुनावणी आणि त्यांना अर्ज माघारीसाठी मिळालेला कमी कालावधी या मुद्यांवरून २९ नोव्हेंबर रोजी कुळगाव बदलापूर नगर परिषदेतील सहा प्रभागांतील निवडणुका स्थगित करण्यात आल्या होत्या. उमदेवारांसाठी हा धक्कादायक निकाल होता. त्यानंतर निवडणूक आयोगाने सुधारित कार्यक्रम जाहीर केला. त्यात फक्त ज्या प्रभागात उमेदवारांनी याचिका न्यायालयात गेलेल्या बाददाखल केली होती त्याच प्रभागातील उमेदवारांना अर्ज मागे घेण्याची संधी होती. त्यानुसार बुधवारी १० डिसेंबर रोजी अर्ज मागे घेण्याची मुदत संपली.
पाच प्रभागातील एकाची माघार
कुळगाव बदलापूर नगर परिषदेतील प्रभाग क्रमांक ५ ब, ८ अ, १० व, १५ ब, १७ अ आणि १९ अ मधील निवडणुका स्थगित करण्यात आल्या होत्या.त्यातील प्रभाग क्रमांक १९ अ मध्ये एकच उमेदवार शिल्लक असल्याने येथे आता मतदान होणार नाही. मात्र इतर प्रभागांमध्ये मतदान होणार आहे. यातील प्रभाग क्रमांक १५ ब मध्ये भाजपचे बंडखोर मनोज ढिले यांनी आपला अपक्ष अर्ज मागे घेतला आहे. उमेदवारी अर्ज मागे घेत मनोज ढिले यांनी भाजप उमेदवारास आपला पाठिंबा दर्शविला आहे, त्यामुळे येथे भाजपला दिलासा मिळाला आहे. येथे एकूण ८ उमेदवार रिंगणात होते. आता उरलेल्या ७ उमेदवारांमध्ये दोन अपक्ष असून इतर पक्षांचे उमेदवार आहेत. तर प्रभाग क्रमांक ५ ब मध्ये ३, ८ अ मध्ये ३, १५ व मध्ये दोन, १७ अ मध्ये ४ उमेदवार रिंगणात आहेत. या सर्व जागांच्या मतदानानंतर २१ डिसेंबर रोजी मतमोजणी पार पडेल.
