बदलापूर : येथील कुळगाव बदलापूर नगर परिषदेच्या शाळांमधील विद्यार्थ्यांच्या गुणवत्ता वाढीसाठी नगरपालिका प्रशासनामार्फत नेहमीच विविध उपक्रम होत असतात. बदलापूर न प चे मुख्याधिकारी मारुती गायकवाड यांच्या दूरदृष्टी नियोजना मुळे नगर परिषदेच्या बहुतांश शाळांमध्ये सेमी इंग्रजी माध्यम असून विद्यार्थ्यांना इंग्रजी विषय सोप्या पद्धतीने समजवून सांगण्यासाठी व इंग्रजी भाषेची गोडी निर्माण करण्यासाठी, प्रशासनाकडून नवनीत फाउंडेशन या व्यावसायिक संस्थेकडून शिक्षकांना इंग्रजी विषयाचे प्रशिक्षण देण्याची कार्यशाळा स्वामी विवेकानंद प्रशिक्षण केंद्र हेद्रपाडा बदलापूर पश्चिम येथे संपन्न झाली.
पालकांचा ओढा इंग्रजी माध्यमाकडे असल्यामुळे नगर परिषदेने गेल्या सहा सात वर्षांपासून न प शाळांमध्ये सेमी इंग्रजी माध्यम सुरू केलेले आहे.त्याला भरघोस प्रतिसाद मिळून न प शाळांचा पट वाढत आहे. याशिवाय नव्याने दाखल झालेल्या विद्यार्थ्यांना मराठी भाषेसहित, इंग्रजी आणि इतर विषयांचे आकलन सोप्या पद्धतीने होण्यासाठी शिक्षकांचे क्षमता वाढीकरिता नवनीत फाउंडेशन आणि कुळगाव बदलापूर नगर परिषद यांच्या संयुक्त विद्यमाने इंग्रजी विषयाचे प्रशिक्षण देण्यात आले. यामध्ये विद्यार्थ्यांसाठी इंग्रजी बोलण्याची पद्धत, शब्दसंग्रह कसा वाढवावा, छोटी छोटी इंग्रजी ची वाक्य कशी बनवावी तसेच अध्यापन करताना विद्यार्थी केंद्रित अध्यापन असावे याचे प्रात्यक्षिकासह प्रशिक्षण शिक्षकांना देण्यात आले. बदलापूर न प शिक्षकांना दरवर्षी 50 तासाचे सेवांतर्गत प्रशिक्षण करणे बंधनकारक आहे. त्यामधील 25 तास हे शासकीय संस्थेने आयोजित केलेले असते तर उर्वरित 25 तासांचे प्रशिक्षण हे संस्थांमार्फत देण्यात येते.
नवनीत सेवा फाउंडेशन अंतर्गत आयोजित करण्यात आलेल्या प्रशिक्षण शिबिरामध्ये शिक्षक इतर अनेक कामांमध्ये व्यस्त असून सुद्धा 32 शिक्षकांनी इंग्रजी विषय कार्यशाळा (प्रशिक्षण) चा लाभ घेतला. यामुळे नगरपालिकेच्या शाळेच्या गुणवत्तेमध्ये वाढ होणार आहे व समाजातील शेतकरी, गरीब, श्रमिक, कष्टकरी स्थलांतरित होतकरू विद्यार्थ्यांचा फायदा होणार आहे.
