कर्जत : कर्जत तालुक्यातील पळसदरी धरण परिसरात हृदयद्रावक घटना घडली असून २० वर्षीय तरुणाचा पाण्यात बुडून मृत्यू झाला आहे. आर्यन थापर (रा. घणसोली) असे मृत तरुणाचे नाव आहे. या घटनेमुळे परिसरात शोककळा पसरली आहे.
मिळालेल्या माहितीनुसार, आर्यन थापर हा भारती विद्यापीठात बीबीए प्रथम वर्षाचा विद्यार्थी होता. महाविद्यालयाच्या सामाजिक प्रकल्पाअंतर्गत तो सुमारे ७० ते ७५ विद्यार्थ्यांसोबत पळसदरी येथे आला होता. कार्यक्रम संपल्यानंतर आर्यन आपल्या मित्रांसह धरण परिसरात फिरण्यासाठी गेला. आर्यनला पोहता येत असल्याने तो पाण्यात उतरला. सुरुवातीला त्याने दोन वेळा पोहून सुरक्षितपणे परत येऊन दाखवले. मात्र तिसऱ्यांदा पाण्यात उतरल्यानंतर तो अचानक खोल पाण्यात बुडाला आणि दिसेनासा झाला. मित्रांनी तत्काळ आरडाओरड करून मदतीसाठी धाव घेतली, मात्र त्याला वाचवता आले नाही.
घटनेची माहिती मिळताच कर्जत पोलीस तसेच खोपोली येथील हेल्प फाउंडेशनची बचाव पथके घटनास्थळी दाखल झाली. रात्री उशिरापर्यंत शोधमोहीम सुरू होती, मात्र अंधारामुळे ती थांबवावी लागली. आज सकाळी पुन्हा शोधमोहीम राबवण्यात आली असता आर्यनचा मृतदेह पाण्यातून बाहेर काढण्यात बचाव पथकाला यश आले.
दरम्यान, हेल्प फाउंडेशनचे गुरुनाथ साठेलकर, पोलीस पाटील विनया खोपकर, डेला अॅडव्हेंचरचे गणेश गीध आणि पोलीस प्रशासनाने नागरिकांना आवाहन केले आहे की, अनोळखी ठिकाणी पाण्याची खोली किंवा परिस्थितीची माहिती नसताना पोहण्यासाठी उतरू नये. अशा ठिकाणी निष्काळजीपणा जीवघेणा ठरू शकतो.
