बदलापूर(प्रतीक टोपले ) : मुरबाड तालुक्यातील म्हसा येथे असलेल्या श्री खाम्बलिंगेश्वर देवस्थानची पारंपरिक व ऐतिहासिक जत्रा आजपासून मोठ्या उत्साहात सुरू होत आहे. दरवर्षीप्रमाणे यंदाही या यात्रेसाठी राज्याच्या विविध भागांतून लाखो भाविक दाखल होत असून, विशेषतः बदलापूर परिसरातून मोठ्या संख्येने नागरिक यात्रेसाठी जात असतात.
ही जत्रा धार्मिक, सांस्कृतिक आणि सामाजिक परंपरेचा महत्त्वाचा भाग मानली जाते. ठाणे जिल्ह्यासह रायगड, पुणे, नाशिक, मुंबई, पालघर तसेच संपूर्ण कोकण पट्ट्यातून भाविक या यात्रेत सहभागी होतात. यंदा सुमारे १७ ते १८ लाख भाविक आणि यात्रेकरू सहभागी होण्याची शक्यता वर्तवली जात आहे.
म्हसा यात्रेचे वैशिष्ट्य म्हणजे येथे भरणारा सुप्रसिद्ध बैल बाजार. या बाजारासाठी शेतकरी, पशुपालक आणि व्यापारी मोठ्या संख्येने उपस्थित राहतात. गुरांची खरेदी-विक्री, विविध व्यापारी व्यवहार, तात्पुरत्या बाजारपेठा तसेच गृहपयोगी वस्तूंची दुकाने यामुळे संपूर्ण परिसर यात्रेच्या रंगात न्हाऊन निघतो.
बदलापूर, अंबरनाथ, उल्हासनगर आणि आसपासच्या परिसरातील नागरिकांसाठी म्हसा यात्रा ही श्रद्धा आणि परंपरेचा एक भाग आहे. अनेक कुटुंबे दरवर्षी आवर्जून या यात्रेला भेट देतात. यंदाही बदलापूर परिसरातून पहाटेपासूनच भाविक म्हसा यात्रेला रवाना झाल्याचे चित्र दिसून येत आहे.
खाम्बलिंगेश्वर देवाचे दर्शन, धार्मिक विधी, जत्रेतील विविध आकर्षणे आणि पारंपरिक वातावरण अनुभवण्यासाठी भाविकांमध्ये मोठा उत्साह पाहायला मिळत असून, आजपासून सुरू झालेली ही यात्रा पुढील काही दिवस संपूर्ण परिसरात भक्तिभावाचे वातावरण निर्माण करणार आहे.
