बदलापूर – आगामी स्थानिक स्वराज्य संस्थांच्या निवडणुका लक्षात घेऊन भाजपाने बदलापूरमध्ये मोठा राजकीय डाव खेळत नवीन समीकरणे उभी केली आहेत. रविवारी शिवसेनेतून भाजपात प्रवेश केलेले महेश जाधव व प्रतिभा जाधव यांना प्रवेश केवळ २४ तासही पूर्ण झाले नसतानाच, प्रतिभा जाधव यांची बदलापूर पूर्व महिला शहराध्यक्षपदी नियुक्ती करण्यात आली. महिला मोर्चा प्रदेशाध्यक्ष आणि आमदार चित्रा वाघ यांच्या हस्ते त्यांच्या नियुक्तीचे पत्र प्रदान करण्यात आले.
दिग्गजांना टाळून –समन्वयाचा पर्याय
नगरपरिषद निवडणुका जवळ आल्याने शहराध्यक्षपदाची चुरस निर्माण झाली असताना, अनेक दिग्गजांकडे दुर्लक्ष करून पक्षाने प्रतिभा जाधव यांच्यावर विश्वास दाखवला आहे. संघटनेत समन्वय साधण्यासाठी ही नियुक्ती महत्त्वाची मानली जात असून बदलापूरमध्ये भाजपची शक्ती वाढवण्याचा हा प्रयत्न मानला जात आहे.पक्षाने व्यक्त केलेल्या विश्वासानुसार, नवीन शहराध्यक्षांना आगामी निवडणुकांमध्ये पक्षाला मजबूत स्थान मिळवून देण्याचे मोठे आव्हान असणार आहे.
नगराध्यक्षा आणण्यासाठी प्रयत्नशील – प्रतिभा जाधव
पक्षाने माझ्यावर मोठा विश्वास दाखवून महत्त्वाची जबाबदारी दिली आहे. संघटनेतील सर्व कार्यकर्त्यांना सोबत घेऊन काम करणार आहे. आगामी महापालिका निवडणुकीत अधिकाधिक नगरसेवक विजयी करण्यासाठी प्रयत्न करू. बदलापूरमध्ये भाजपाची नगराध्यक्षा आणण्यासाठी सर्वतोपरी मेहनत घेणार आहे.
