बदलापूर : कुळगाव बदलापूर नगरपरिषद अंतर्गत आंतरराष्ट्रीय मानक निर्धारण संस्था मानांकन प्राप्त शाळा क्रमांक १५,एरंजाड येथील विद्यार्थ्यांनी राष्ट्रीय आर्थिक दुर्बल घटक विद्यार्थ्यांसाठी गुणवत्ता आधारित शिष्यवृत्ती परीक्षेत उल्लेखनीय यश संपादन करत शाळेचा मान उंचावला आहे. यंदा एरंजाड शाळेतील तब्बल सात विद्यार्थी शिष्यवृत्तीस पात्र ठरले असून त्यांना इयत्ता नववी ते बारावीपर्यंत दरमहा १,००० प्रमाणे शिष्यवृत्ती मिळणार आहे.
महाराष्ट्र राज्य परीक्षा परिषद, पुणे यांच्या मार्फत २००८ पासून घेण्यात येणारी ‘राष्ट्रीय आर्थिक दुर्बल घटक विद्यार्थ्यांसाठी शिष्यवृत्ती योजना परीक्षा’ ही राज्यस्तरीय स्पर्धा परीक्षा आहे. या परीक्षेत यश मिळविणाऱ्या विद्यार्थ्यांना इयत्ता नववी ते बारावीपर्यंत दरमहा १,००० शिष्यवृत्ती दिली जाते.एरंजाड शाळेचे सात विद्यार्थी या विद्या वेतनासाठी पात्र ठरले असून त्यांना बारावीपर्यंत ही शिष्यवृत्ती मिळणार आहे.
या परीक्षेमुळे विद्यार्थ्यांची स्पर्धात्मक परीक्षांची तयारी अधिक भक्कम होते.अभ्यासातील सातत्य, आत्मविश्वास आणि परिश्रम करण्याची क्षमता वाढण्यास या परीक्षेचा मोठा हातभार लागतो.
मुख्याध्यापिका वृषाली बोराडे यांच्या मार्गदर्शनाखाली शाळेत विविध शिष्यवृत्ती व स्पर्धा परीक्षांसाठी विद्यार्थ्यांना नियमित प्रशिक्षण दिले जाते.शिष्यवृत्ती परीक्षा,गणित संबोध परीक्षा,गणित प्रभुत्व परीक्षा,डॉक्टर होमी भाभा बाल वैज्ञानिक परीक्षा,राष्ट्रीय व महाराष्ट्र प्रज्ञाशोध परीक्षा,चित्रकला परीक्षा आदी विविध उपक्रमांत विद्यार्थ्यांचा सक्रिय सहभाग असतो.या परीक्षांचे शुल्क नगरपरिषद अदा करत असून आवश्यक कार्यशाळांचे आयोजनही केले जाते.
या यशामागे वर्गशिक्षक गीताराम मरभळ व त्यांना सहकार्य करणाऱ्या समृद्धी कौर,सानिका कुलकर्णी,वरिष्ठ शिक्षक सचिन डगळे यांचे विशेष मार्गदर्शन लाभले.शिक्षण विभाग प्रमुख मनीषा फडतरे,मुख्याधिकारी मारुती गायकवाड,उपनगराध्यक्षा प्रियांका दामले आणि नगराध्यक्षा रुचिता घोरपडे यांचे सहकार्य लाभले.
