अंबरनाथ, ता. ७ (बातमीदार) :अंबरनाथमध्ये गणेशोत्सव मंडळाच्या गणरायासमोरील मोदकाचा लिलाव तब्बल एक लाख ८५ हजार रुपयांना झाला. भाविकांच्या श्रद्धेचा परमोच्च बिंदू मानल्या जाणाऱ्या य लिलावाची परंपरा १४ वर्षापासून सुरू आहे. यंदा अनंत चतुर्दर्शीच्या दिवशी लिलाव विक्रमी बोलीवर पार पडला.
पश्चिमेतील बुवापाडा परिसरातील खाटूश्याम मंडळाने २०११ मध्ये मोदक लिलावाची परंपरेची सुरुवात केली. पहिल्या वर्षी घनश्याम शर्मा यांनी ७१ हजार रुपयांना मोदक खरेदीकरून ही परंपरा जपली होती. यंदा शनिवारी (ता. ६) मंडळाचे अध्यक्ष प्रमोदकुमार चौबे यांनी लिलावाची सुरुवात केली. सुरुवातीला एका भाविकाने ७९ हजार रुपयांची बोली लावली. अखेरीस कल्याण येथील रहिवासी अनामिक त्रिपाठी यांनी तब्बल एक लाख ८५ हजार रुपयांना हा मोदक खरेदी केला. तीन वर्षांपासून आम्ही हा मोदक खरेदी करण्यासाठी प्रयत्न करत होतो. मात्र, यावर्षी गणरायाची कृपा झाली आणि मोदक विकत घेता आला, अशी भावना अनामिक त्रिपाठी यांनी व्यक्त केली.
