बदलापूर-मुळगाव (प्रतीक टोपले): श्री खंडोबा नवरात्र उत्सवाच्या पार्श्वभूमीवर मुळगाव खंडोबा देवस्थान परिसरात भक्तीमय वातावरण निर्माण होऊ लागले आहे. २१ नोव्हेंबर ते २६ नोव्हेंबर २०२५ या कालावधीत चंपाषष्ठी निमित्त भव्य कार्यक्रमांचे आयोजन करण्यात आले आहे. या पवित्र सोहळ्याच्या तयारीची सुरुवात मंदिर परिसराच्या स्वच्छतेने झाली असून, ही जबाबदारी मा. सरपंच हनुमान भोईर यांनी उत्कृष्टरीत्या पार पाडली आहे.
गडावर जाणाऱ्या पायऱ्या, परिसरातील पायवाट, तसेच मंदिराभोवतालच्या जागेची त्यांनी मनोभावे साफसफाई केली. दरवर्षीप्रमाणे यंदाही कोणतीही अपेक्षा न ठेवता त्यांनी निस्वार्थीपणे सेवा केली. अनेक वर्षांपासून ते मंदिराशी निगडित विविध सेवाभावी कामांत पुढाकार घेत असून, भक्त आणि ग्रामस्थांकडून त्यांच्या कार्याची मोठ्या प्रमाणावर प्रशंसा केली जाते.
श्री. खंडोबा हे संपूर्ण परिसराचे कुलदैवत असून चंपाषष्ठीच्या निमित्ताने हजारो भक्त येथे दर्शनासाठी गर्दी करतात. त्यासाठी परिसर स्वच्छ, सुरक्षित आणि सुखद राहावा म्हणून संपूर्ण भोईर कुटुंब यांचे हे योगदान विशेष महत्त्वाचे ठरते. स्वच्छतेदरम्यान त्यांनी परिसरातील गवत उपटणे, कचरा हटवणे, जमिनीचे समतलीकरण करणे यांसारखी कामे तातडीने पूर्ण केली.
आगामी दिवसात नवरात्रीत विविध धार्मिक कार्यक्रम, पूजा-अर्चा आणि पारंपरिक उत्सव पार पडणार असून तयारीची गती आणखी वाढवण्यात आली आहे.
चंपाषष्ठी च्या दिवशी खंडोबा देवाला हलद लावली जाते. बदलापूर सह संपूर्ण ठाणे जिल्ह्यातील भाविक या कार्यक्रमाला उपस्थित असतात. मंदिर परिसर स्वच्छ रहावे म्हणून हनुमान भोईर हे दरवर्षी मंदिर परिसराची स्वच्छता करतात.
