मुंबई:तंत्रज्ञानाच्या वाढत्या वापरासह एआयचा गैरवापरही समोर येऊ लागला आहे. मुंबईच्या एसी लोकलमध्ये एआयच्या मदतीने तयार केलेली बनावट यूटीएस तिकिटे वापरताना तीन प्रवासी पकडले गेले. तिकीट तपासनीस प्रशांत कांबळे यांनी दाखवलेल्या सतर्कतेमुळे हा फसवणूक प्रकार उघडकीस आला.
टीसीने तपासणीदरम्यान तीनही प्रवाशांकडील तिकिटांमध्ये विसंगती आढळल्याने त्यांना प्रश्न विचारले असता, आरोपी कोणतंच उत्तर देऊ शकले नाहीत. चौकशीत त्यांनी एआय आणि फोटो-एडिटिंग सॉफ्टवेअर वापरून बनावट सीझन पास तयार केल्याचे उघड झाले. तिन्ही आरोपींविरुद्ध तात्काळ गुन्हा दाखल करण्यात आला आहे.
मध्य रेल्वेने सांगितले की, बनावट तिकिटे तयार करणे किंवा वापरणे हा गंभीर गुन्हा असून भारतीय न्याय संहिता अंतर्गत 5 ते 7 वर्षांपर्यंत तुरुंगवासाची तरतूद आहे. या प्रकारांवर अंकुश ठेवण्यासाठी रेल्वेने आतापर्यंत चार स्वतंत्र एफआयआर नोंदवले आहेत.
दंड अन्यथा थेट तुरुंगवास
मध्य आणि पश्चिम रेल्वे मार्गांवर गेल्या काही दिवसांमध्ये लोकलचे बनावट तिकीट आणि सिजनल पास काढून काही प्रवासी प्रवास करत असल्याचं आढळून आलं आहे. या प्रकाराला आळा घालण्यासाठी आता रेल्वेने कारवाईला सुरुवात केली आहे. बनावट तिकीट आढळून आल्यास त्या प्रवासाला भारतीय न्याय संहिता अंतर्गत रेल्वेची फसवणूक केल्याप्रकरणी थेट 5 ते 7 वर्षांपर्यंत तुरुंगवासाची शिक्षा होऊ शकते.
यूटीएस अॅपचा गैरवापर केला जात आहे.
मुंबई लोकल ट्रेनसाठी तिकिटे देण्यासाठी रेल्वे यूटीएस (अनारक्षित तिकीट प्रणाली) नावाच्या अॅप्लिकेशनचा वापर करते. त्याच्या मदतीने तिकिटे सहज मिळवता येतात. पण अलीकडेच, तिकीट कलेक्टर (टीसी) च्या लक्षात आले की, काही प्रवासी बनावट तिकिटे तयार करण्यासाठी एआय आणि फोटोशॉप अॅप्लिकेशनचा वापर करत आहेत.
प्रवाशांना आवाहन
बनावट तिकिट रॅकेटचा पर्दाफाश करण्यात टीटीई प्रशांत कांबळे यांनी दाखवलेल्या दक्षतेबद्दल मध्यरेल्वेने त्यांचे कौतुक केले आहे. रेल्वेने सर्व प्रवाशांना फक्त अधिकृत काउंटर, एटीव्हीएम मशीन किंवा खऱ्या यूटीएस अॅपवरून तिकिटे खरेदी करण्याचा सल्ला दिला आहे. बनावट किंवा एआय-जनरेटेड तिकिटे वापरणाऱ्यांवर कठोर कायदेशीर कारवाई केली जाईल. रेल्वे आता अशा प्रकरणांवर अधिक बारकाईने लक्ष ठेवून आहे.
