बदलापूर: सकल मराठा समाज हितवर्धक मंडळाच्या वतीने यंदाही बदलापुरात मराठा महोत्सवाचे आयोजन करण्यात आले आहे. यानिमित्ताने छत्रपती शिवाजी महाराज व छत्रपती संभाजी महाराज यांच्या जीवनपटावर आधारित “शिवशंभू शौर्यगाथा” या महानाट्याचे सादरीकरण केले जाणार आहे.
गुरुवारी (ता.१९) बदलापूर पूर्वेकडील कारमेल शाळेजवळ श्री छत्रपती शिवाजी महाराज क्रीडा संकुलात संध्याकाळी ६ ते १० दरम्यान मराठा महोत्सव साजरा केला जाणार आहे. या महोत्सवात सादर केल्या जाणाऱ्या “शिवशंभू शौर्यगाथा” या
महानाट्यमध्ये दोन मजली भव्य रंगमंचावर दोनशे कलाकारांसह प्रत्यक्ष घोडे, उंट व बैलगाडीसह शिवरायांच्या प्रेरणादायी इतिहासातील प्रसंग पाहण्याची संधी मिळणार असल्याची माहिती महोत्सवाचे स्वागताध्यक्ष अरुण चव्हाण यांनी दिली. अक्कलकोट संस्थांनचे राजे श्रीमंत छत्रपती मालोजीराजे भोसले यांची या कार्यक्रमाला विशेष उपस्थिती राहणार असल्याची माहिती कोषाध्यक्ष सुहास पोखरकर यांनी दिली. याप्रसंगी सकल मराठा समाज हितवर्धक मंडळाचे उपाध्यक्ष अविनाश देशमुख, सहसचिव मनोज जाधव, माजी नगरसेवक अविनाश मोरे आदी उपस्थित होते
