बदलापूर : महिला पत्रकार श्रद्धा ठोंबरे यांच्यावर हल्ला झाल्याची धक्कादायक घटना आज सकाळी घडली आली. बदलापूर पूर्व पोलीस ठाण्याच्या बाहेरच त्यांच्या गाडीची काच फोडण्यात आली. या प्रकारामुळे परिसरात तणावाचे वातावरण निर्माण झाले आहे. बदलापूरमधील काही नगरसेवकांना निनावी पत्र येत असल्याबाबत श्रद्धा ठोंबरे यांनी बातमी प्रसारित केली होती. या वृत्तानंतर संबंधितांमध्ये नाराजी पसरल्याचे सांगितले जाते. काल रात्री उशिरा मोठ्या प्रमाणात जमाव बदलापूर पूर्व पोलीस ठाण्याबाहेर जमला होता.
दरम्यान, आज सकाळी प्रथम बदलापूर पालिकेसमोर काही महिलांनी श्रद्धा ठोंबरे यांच्या गाडीला घेराव घातला. त्यानंतर त्या तक्रार देण्यासाठी बदलापूर पूर्व पोलीस ठाण्यात गेल्या असता, काही महिलांनी त्यांच्या गाडीवर हल्ला चढवून काच फोडल्याचा आरोप आहे.
या प्रकरणात एका भाजपा नगरसेवकाच्या काही समर्थकांचा सहभाग असल्याचा संशय व्यक्त करण्यात येत आहे. पोलिस ठाण्याबाहेर हा प्रकार घडल्याने पोलिसांच्या कार्यक्षमतेवर देखील प्रश्नचिन्ह निर्माण होत आहे. पत्रकारांवरील वाढत्या हल्ल्यांच्या पार्श्वभूमीवर या घटनेचा निषेध व्यक्त होत आहे.
