बदलापूर :- इराण, इस्त्रायल आणि अमेरीका युध्दाच्या पार्श्वभुमीवर पंतप्रधान नरेंद्र मोदी यांच्याकडून संसदेत करण्यात आलेल्या निवेदनानंतर सोशल मिडियावर पसरलेल्या पेट्रोलचा तुडवडा आणि लॉक डाऊनच्या अफवांमुळे धास्तावलेल्या नागरिकांची पेट्रोलसाठी झुंबड उडाली आहे. मंगळवारी संध्याकाळपासून अंबरनाथ, बदलापूर शहरातील पेट्रोल पंपावर लांबच लांब रांगा लागल्या असून बुधवारी सकाळपासूनही हेच चित्र कायम आहे.
इराण, इस्त्रालय आणि अमेरीका युद्धाचा परिणाम म्हणून एकीकडे गेल्या काहि दिवसांपासून गॅस सिलेंडरचा मोठ्या प्रमाणात तुटवडा भासत आहे. अनेक गॅस अभावी हजारो हॉटेल्स बंद असून घरगुती वापराच्या गॅस सिलेंडरसाठीही नागरीकांच्या रांगा पहायला मिळत आहे. तोच युध्दाच्या पार्श्वभुमीवर गेले दोन दिवस संसदेच्या अधिवेशनात पंतप्रधान नरेंद्र मोदी यांच्याकडून युध्दाच्या परिस्थितीबाबत देशाला संबोधित करतांना परिस्थितीबाबत अवगत करण्यात आले. मात्र त्यानंतर पुढील काही दिवस पेट्रोल उपलब्ध होणार नसून लॉक डाऊन लागण्यासारखी परिस्थिती उदभवण्याबाबत सोशल मिडियावर अफवा पसरत आहेत. त्यातूनच मंगळवारी संध्याकाळपासून अंबरनाथ, बदलापूर शहरातील अनेक पेट्रोल पंपंवार दुचाकी, चाकचाकी चालकांनी पेट्रोल भरण्यासाठी मोठ्या रांगा लावल्या होत्या. त्यामुळे अंबरनाथ, बदलापूरमधील अनेक पेट्रोल पंपावरील पेट्रोल, डिझेलचा साठा संपल्याने पेट्रोल पंप रात्री बंद करण्यात आले होते. तर बुधवारीही पेट्रोल पंपावर हीच परिस्थिती पहायला मिळाली. सकाळपासून नागरीकांनी कल्याण, बदलापूर राज्य महामार्ग, बदलापूरमधील पेट्रोल पंपावर एकच गर्दी केली होती. त्यामुळे वाहनांमुळे राज्य महामार्गावर कोंडी होवून वाहनांच्या रांगेत चालकांचे वाद आणि हाणामार्यांचे प्रसंग उदभवले होते. त्यातून कायदा सुव्यवस्थेची परिस्थिती निर्माण होत असल्याचे पाहून अनेक पेट्रोल पंप चालकांनी पोलिसांकडे सुरक्षेसाठी धाव घेतली. त्यामुळे बुधवारी दिवसभर अनेक पेट्रोल पंपावर गर्दी नियंत्रण करण्यासाठी पोलिसांना पाचारण करावे लागले होते. तर पेट्रोलचा मुबलकसाठा उपलब्ध आहे. त्यामुळे वाहन चालकांनी अफवांना बळी न पडता तुटवड्याबाबत चिंता न करता गरज असेल तेवढेच पेट्रोल भरण्याचे आवाहन पेट्रोल पंप चालकांकडून करण्यात येत आहे.
मंगळवारी संध्याकाळपासून पेट्रोल मिळेल की नाही या भीतीने डिझेल, पेट्रोलसाठी रांगा लागल्या आहेत. मुबलक पेट्रोल आहे, पॅनिक होऊ नका, असे सांगूनही लोक भर उन्हातही रांगा लावत आहेत.
– राहुल थोरात
मालकः स्वामी फ्युल हब, बदलापूर
