बदलापूर : कुळगाव -बदलापूर नगरपरिषदेच्या निवडणुकीत राष्ट्रवादी काँग्रेस (अजित पवार गट) पक्ष निर्णायक भूमिका बजावत ‘किंग मेकर’ ठरला आहे. संख्याबळ मर्यादित असले तरी राष्ट्रवादीच्या मतांनी निवडणुकीचा निकाल आणि सत्तासमीकरणे बदलली असल्याचे स्पष्ट झाले आहे.
या निवडणुकीत राष्ट्रवादी काँग्रेस (अजित पवार गट) ने एकूण आठ जागांवर उमेदवार उभे केले होते. या आठही जागांवर पक्षाला मिळून जवळपास १८ हजार हुन जास्त मते मिळाली. प्रत्यक्षात तीन नगरसेवक निवडून आले असले, तरी मिळालेल्या मतांनी थेट नगराध्यक्ष पदाच्या निवडणुकीत महत्त्वाची भूमिका बजावली.
नगरपालिकेच्या एकूण निकालात भाजपाचे २२ नगरसेवक निवडून आले असून शिवसेना (शिंदे गट) चे २४ तर राष्ट्रवादी काँग्रेस (अजित पवार गट)चे ३ नगरसेवक विजयी झाले आहेत. मात्र सर्वाधिक लक्ष वेधले गेले ते थेट नगराध्यक्ष पदाच्या लढतीकडे. या पदासाठी भाजप,राष्ट्रवादी काँग्रेस (अजित पवार गट),RPI युतीच्या रुचिता राजन घोरपडे तसेच शिवसेनेच्या (शिंदे गट) विना वामन मात्रे यांच्यात अत्यंत चुरशीची लढत पाहायला मिळाली.
मतमोजणीअंती भाजपाच्या रुचिता राजन घोरपडे यांना ६४ हजार ६०४ मते मिळाली, तर विना वामन मात्रे यांना ५४ हजार ९७० मते मिळाली. अखेर ७ हजार ६३४ मतांनी रुचिता घोरपडे यांनी थेट नगराध्यक्ष पदावर विजय मिळवला.
या विजयात राष्ट्रवादी काँग्रेस (अजित पवार गट) ला मिळालेल्या जवळपास १८ हजार हुन जास्त मतांचा मोठा वाटा असल्याचे राजकीय वर्तुळात बोलले जात आहे. या मतांमुळेच भाजपाच्या उमेदवाराला निर्णायक आघाडी मिळाल्याचे मानले जात असून, त्यामुळेच या निवडणुकीत राष्ट्रवादी काँग्रेस (अजित पवार गट) ‘किंग मेकर’ ठरल्याची चर्चा शहरभर सुरू आहे.
