बदलापूर : शिवसेनेच्या कुळगाव–बदलापूर नगरपरिषद गटनेतेपदी माजी उपनगराध्यक्ष मा. श्रीधर दत्तात्रय पाटील यांची सर्वानुमते निवड करण्यात आली आहे. शनिवारी बदलापूर येथे पार पडलेल्या शिवसेनेच्या नवनिर्वाचित नगरसेवकांच्या बैठकीत हा निर्णय घेण्यात आला.
या बैठकीत नगरपरिषदेतील कार्यपद्धती, विकासकामांचा आढावा तसेच आगामी काळातील नियोजनावर चर्चा करण्यात आली. त्यानंतर सर्व नगरसेवकांच्या सहमतीने श्रीधर पाटील यांची गटनेतेपदी निवड करण्यात आली. त्यांच्या अनुभवाचा व नेतृत्वगुणांचा विचार करून त्यांच्यावर ही जबाबदारी सोपविण्यात आल्याचे बैठकीत सांगण्यात आले.
श्रीधर पाटील यांनी यापूर्वी उपनगराध्यक्ष म्हणून काम पाहिले असून त्यांच्या कार्यकाळात शहरातील मूलभूत सुविधा, स्वच्छता, पाणीपुरवठा तसेच विविध नागरी कामांना गती मिळाली होती. त्यामुळे नगरपरिषदेतील कामकाज अधिक प्रभावीपणे पार पाडण्यासाठी त्यांची निवड उपयुक्त ठरेल, असा विश्वास व्यक्त करण्यात आला.
निवडीनंतर उपस्थित नगरसेवक, पदाधिकारी व कार्यकर्त्यांनी श्रीधर पाटील यांचे अभिनंदन केले. यावेळी बोलताना श्रीधर पाटील यांनी सर्वांचे आभार मानत, नगरपरिषदेच्या माध्यमातून नागरिकांच्या समस्या सोडविण्यास प्राधान्य देण्यात येईल व सर्वांना सोबत घेऊन शहराच्या विकासासाठी काम केले जाईल, असे सांगितले.
या निवडीमुळे शिवसेनेची नगरपरिषदेतली भूमिका अधिक सक्षम होईल, अशी प्रतिक्रिया पक्षाच्या पदाधिकाऱ्यांनी व्यक्त केली आहे.
