नवीन वर्षाच्या स्वागतासाठी दोन आठवडे बाकी आहेत. मात्र, आत्तापासूनच अनेकांनी नव्या वर्षाच्या स्वागताची तयारी सुरू केली आहे. तुम्ही देखील नव्या वर्षाचे स्वागत जल्लोषात करण्यासाठी नियोजन करत असाल आणि तुम्ही मद्यप्राशन करून सेलिब्रेशन करण्याची तयारी करत असाल तर यंदा जरा काळजी घ्यावी लागणार आहे.
कारण यंदा राज्यात महानगरपालिका निवडणुकांची आचारसंहिता लागू झाली आहे. या आचारसंहितेमुळे 31 डिसेंबरला कायद्याच्या चौकटीत राहून सेलेब्रेशन करावे लागणार आहे.
राज्यात सोमवारी निवडणूक आयोगाने मुंबई, ठाणे, पुणे, नागपूर, नाशिकसह 29 महापालिकांच्या निवडणुकांची घोषणा केली आहे. 15 जानेवारी रोजी मतदान होणार असून 16 तारखेला निकाल जाहीर होतील. तोपर्यंत ही आचारसंहिता लागू असेल. आचारसंहितेदरम्यान प्रचार, सभा, मिरवणुका यावर मर्यादा घालण्यात आल्या असून, त्याचबरोबर अवैध मद्यविक्री आणि मद्यप्राशनावरही कडक नजर ठेवली जात आहे. त्यामुळे प्रशासन अलर्ट मोडवर आहे. 31 डिसेंबरच्या पार्श्वभूमीवर ढाबे, हॉटेल्स, रिसॉर्ट्स आणि महामार्गालगतची ठिकाणे राज्य उत्पादन शुल्क विभागाच्या विशेष रडारवर आहेत. अशा स्थितीत 31 डिसेंबरला तुम्ही बेकायदेशीर कृत्य केले तर तुमच्यावर कठोर कारवाई होऊ शकते.
परवानगीशिवाय दारू पार्टी महागात
नियमांनुसार, परमीट असलेल्या बारव्यतिरिक्त इतर कोणत्याही ठिकाणी परवानगीशिवाय मद्यविक्री किंवा मद्यपान करता येत नाही. मात्र अनेक ठिकाणी ढाबे, हॉटेल्स किंवा खाजगी पार्टीमध्ये अवैधरीत्या दारू उपलब्ध करून दिली जाते. पुणे ग्रामीण, ठाणे, नाशिक, सोलापूर यांसारख्या भागांत अशा तक्रारी सातत्याने समोर येतात. यंदा मात्र अशा प्रकारांकडे दुर्लक्ष न करता थेट कारवाई केली जाणार आहे.
मद्यपी आणि चालक दोघांवरही गुन्हा
परवानगीशिवाय कोणी मद्यविक्री करताना आढळल्यास संबंधित ढाबा किंवा हॉटेल चालकावर दारूबंदी कायद्यानुसार गुन्हा दाखल केला जाऊ शकतो. यामध्ये 5,000 रुपये ते 25,000 रुपयांपर्यंत दंडाची तरतूद आहे. त्याचप्रमाणे मद्यपान करणाऱ्या व्यक्तीवरही 1,000 रुपये ते 5,000 रुपयांपर्यंत दंड ठोठावला जाऊ शकतो. काही प्रकरणांमध्ये अटकेची कारवाईही होऊ शकते.
एक रुपयामध्ये ऑनलाइन परवाना
राज्य उत्पादन शुल्क विभागाने नागरिकांना दिलासा देण्यासाठी एक सोपा पर्याय उपलब्ध करून दिला आहे. केवळ एक रुपया इतक्या नाममात्र शुल्कात ऑनलाइन मद्यपान परवाना काढता येतो. त्यामुळे 31 डिसेंबरला पार्टी किंवा सेलिब्रेशनचा विचार करत असाल, तर हा परवाना काढणे आवश्यक आहे. परवाना नसल्यास कायदेशीर अडचणीत सापडण्याची शक्यता नाकारता येत नाही.
विशेष पथके आणि कडक तपासणी
आचारसंहिता आणि नववर्ष स्वागत समारंभ लक्षात घेता राज्य उत्पादन शुल्क विभागाने तपासणीसाठी विशेष पथके तैनात केली आहेत. अवैध दारूविक्री, वाहतूक आणि साठा यावर बारकाईने लक्ष ठेवले जात आहे. कोणतीही संशयास्पद माहिती असल्यास नागरिकांनी 18002339999 या टोल फ्री क्रमांकावर किंवा 8422001133 या व्हॉट्सॲप क्रमांकावर तक्रार करण्याचे आवाहन करण्यात आले आहे.
सेलिब्रेशन करा, पण नियम पाळून
नवीन वर्षाचं स्वागत आनंदात करणं चुकीचं नाही, मात्र कायद्याच्या चौकटीत राहणं तितकंच महत्त्वाचं आहे. यंदा निवडणुकीची आचारसंहिता आणि प्रशासनाची कडक भूमिका लक्षात घेता, नियमांचे पालन करूनच 31 डिसेंबर साजरा करणेच शहाणपणाचे ठरणार आहे. अन्यथा क्षणिक मौजमस्ती मोठ्या कारवाईत बदलू शकते.
