राज्य सरकारी कर्मचाऱ्यांसाठी सुट्ट्यांच्या नियोजनासंदर्भात महत्त्वाचा निर्णय घेण्यात आला असून, यामुळे कर्मचाऱ्यांना मोठा दिलासा मिळणार आहे. महाराष्ट्र शासन वित्त विभाग यांनी नैमित्तिक रजा (Casual Leave) संदर्भातील नियमांमध्ये बदल करत कर्मचाऱ्यांना रजेच्या आधी किंवा नंतर येणारे रविवार तसेच सार्वजनिक सुट्ट्या जोडण्यास मुभा दिली आहे.
नवीन नियमावलीनुसार, शासकीय कर्मचाऱ्यांना नैमित्तिक रजेच्या सुरुवातीला (Prefix), रजेच्या शेवटी (Suffix) किंवा रजेच्या कालावधीत येणारे रविवार व इतर शासकीय सुट्ट्या रजेसोबत जोडता येणार आहेत. यापूर्वी अशा प्रकारच्या सुट्ट्या जोडण्याबाबत अनेकदा अडचणी येत होत्या. मात्र, नव्या निर्णयामुळे कर्मचाऱ्यांना सलग सुट्ट्यांचे अधिक सोयीस्कर नियोजन करता येणार आहे.
शासनाने या सवलतीसोबत काही अटी आणि मर्यादाही निश्चित केल्या आहेत. त्यानुसार, एका वेळेस घेतलेली नैमित्तिक रजा आणि त्याला जोडलेल्या सार्वजनिक सुट्ट्यांचा एकूण कालावधी कोणत्याही परिस्थितीत 7 दिवसांपेक्षा जास्त असू नये, असे स्पष्ट करण्यात आले आहे. मात्र, अत्यंत अपवादात्मक परिस्थितीत ही मर्यादा 10 दिवसांपर्यंत वाढविण्याची तरतूद कायम ठेवण्यात आली आहे.
या निर्णयामुळे विशेषतः कौटुंबिक कार्यक्रम, वैयक्तिक कारणे किंवा प्रवासाचे नियोजन करणाऱ्या कर्मचाऱ्यांना मोठा फायदा होणार आहे. सलग सुट्ट्या मिळाल्यामुळे कर्मचाऱ्यांचा मानसिक ताण कमी होऊन कामकाजातील कार्यक्षमता वाढण्यास मदत होईल, अशी अपेक्षा व्यक्त केली जात आहे.
हा आदेश राज्यपालांच्या आदेशानुसार जारी करण्यात आला असून, वित्त विभागाचे उपसचिव व्यं. दे. पानसे यांनी हा शासन निर्णय प्रसिद्ध केला आहे. शासनाच्या या निर्णयाचे राज्यातील विविध कर्मचारी संघटनांकडून स्वागत करण्यात येत आहे.
