अंबरनाथ , (वा.) शहरातील पूर्व आणि पश्चिम भागात असलेल्या स्मशानभूमीत मूलभूत सोयीसुविधा तात्काळ उपलब्ध करुन द्या. अशा सूचना आमदार डॉ. बालाजी किणीकर यांनी नगरपालिका प्रशासनाला दिल्या. बुधवारी (ता.१०) रोजी आमदार किणीकर यांनी पालिका अधिकाऱ्यांच्या उपस्थितीत पूर्व आणि पश्चिम भागातील स्मशानभूमीची पाहणी केली.यावेळी अंबरनाथ पूर्व व पश्चिम भागातील स्मशानभूमीत पार्थिवाचे अंतिम संस्कार करण्याचा खर्च हा सर्वसामान्य जनतेस परवडणारा नसून पूर्वेकडील हिंदू स्मशानभूमीतील डिझेल दाहिनी तसेच पश्चिम भागातील स्मशानभूमी येथिल मोफतअसलेली गॅस दाहिनी चालवण्याकरिता जे अडथळा भासत आहेत ते तात्काळ दूर करावेत.
तसेच दोन्ही स्मशानभूमीत स्वच्छता ठेवावी, नागरिकांना लागणाऱ्या मूलभूत सुविधा जसे पिण्याचे पाणी, शौचालय ह्या सुविधा त्वरित उपलब्ध करून द्याव्यात. अशा सूचना आमदार किणीकर यांनी अधिकाऱ्यांना दिल्या. यावेळी अंबरनाथ नगरपरिषदेचे मुख्याधिकारी उमाकांत गायकवाड, माजी उपनगराध्यक्ष अब्दुल शेख, माजी नगरसेवक सुभाष साळुंके, रवींद्र पाटील, रेश्मा गुडेकर, तसेच नगरपालिकांचे शहर अभियंता, आरोग्य व घनकचरा व्यवस्थापन अधिकारी, तसेच इतर संबंधित अधिकारी उपस्थित होते.
