बदलापूर : बदलापूरमधील बारवी धारण परिसरात एका फार्म हाऊस मधे तब्बल ९ फुटांचा अजगर आढळून आल्याने परिसरात मोठी खळबळ उडाली. झाडाझुडपांमध्ये मोठा साप फिरत असल्याचे काही कामगारांच्या निदर्शनास आल्यानंतर स्थानिक नागरिकांनी तातडीने सर्पमित्रांना माहिती दिली. अचानक समोर आलेल्या विशाल अजगरामुळे काही काळ नागरिकांमध्ये भीतीचे वातावरण निर्माण झाले होते.
घटनेची माहिती मिळताच सर्पमित्रांनी घटनास्थळी धाव घेत बचावकार्य सुरू केले. परिसरातील नागरिकांना सुरक्षित अंतरावर ठेवत त्यांनी काळजीपूर्वक अजगराला पकडण्यास सुरुवात केली. या वेळी परिसरात नागरिकांची मोठी गर्दी झाली होती. अनेकांनी मोबाईलमध्ये या घटनेचे चित्रीकरणही केले.
जवळपास अर्धा तास सुरू असलेल्या बचाव मोहिमेनंतर सर्पमित्रांनी अजगराला सुरक्षितरीत्या पकडण्यात यश मिळवले. सर्पमित्रांनी सांगितले की, जंगल परिसरातील अधिवासात बदल झाल्यास किंवा अन्नाच्या शोधात साप मानवी वस्तीजवळ येण्याची शक्यता असते. अजगर विषारी नसला तरी त्याच्यापासून सुरक्षित अंतर राखणे आवश्यक असल्याचे त्यांनी स्पष्ट केले.
पकडण्यात आलेल्या अजगराला वन विभागाच्या मार्गदर्शनाखाली नैसर्गिक अधिवासात सोडण्यात येणार असल्याची माहिती देण्यात आली. तसेच अशा प्रकारचे साप आढळल्यास घाबरून न जाता वन विभाग किंवा प्रशिक्षित सर्पमित्रांशी संपर्क साधावा, असे आवाहन वन्यजीव तज्ज्ञांनी नागरिकांना केले आहे.
