उल्हासनगर: कोणताही सण, उत्सव, समारंभव किंवा कोणत्याही निवडणुका असल्या की बॅनर बाजी होतेच आणि त्यातच उल्हासनगर हे ठिकाण ठाणे जिल्ह्यातील सर्वात स्वस्त बॅनर छपाईच ठिकाण आहे. त्यामुळे त्यामुळे उल्हासनगर शहरामध्ये रस्त्यांवर आणि सार्वजनिक ठिकाणी अधिक प्रमाणात बेकायदेशीर जाहिराती फलक, होर्डिंग्ज आणि बॅनर लावले जातात. यावर पालिकेने धडक कारवाई करायला सुरवात केली आहे.
उच्च न्यायालयाने स्पष्ट आदेश देऊन देखील शहरामध्ये विनापरवानगी बॅनर बाजी सुरूच आहे म्हणून प्रशासनाने या विभागांना कठोर कारवाई करण्याचे निर्देश दिले आहे.
उल्हासनगरमध्ये चालू असलेल्या बॅनर बाजी च्या विरोधात प्रशासनाने काही सहाय्यक आयुक्त पथक तयार केले आहेत या पथकांच्या सहाय्याने विविध ठिकाणी कारवाई करत एकूण १३ गुन्हे दाखल केले आहेत.
गेल्या काही वर्षात स्वस्त झालेल्या बॅनर आणि फलकबाजीमुळे विनापरवानगी चमकू नेते, पदाधिकाऱ्यांकडून बॅनर लावले जातात. निवडणूक वगळता अशा बॅनर, फलकांची कोणतीही परवानगी घेतली जात नाही. त्यात उल्हासनगर हे ठाणे जिल्ह्यातील सर्वात स्वस्त बॅनर छपाईची बाजारपेठ असलेले शहर आहे. येथून उल्हासनगर, अंबरनाथ, बदलापूर ते थेट कर्जत, कल्याण, डोंबिवली आणि ठाण्यातून बॅनर छपाई करून घेतली जाते. त्यामुळे शहरात हे तंत्रज्ञान स्वस्तात उपलब्ध असल्याने मोठ्या प्रमाणावर बॅनरबाजी केली जाते.
गेल्या काही दिवसांपासून पालिका निवडणुकांचे वेध अनेकांना लागले आहेत. त्यामुळे हौशी इच्छुकांनी कोणत्याही प्रसंगाला बॅनरबाजी सुरू केली आहे, परिणामी शहरात बेकायदा फलकबाजी वाढली आहे. जनहित याचिका क्रमांक १५५/२०११ मध्ये उच्च न्यायालयाने शहरात कोणत्याही प्रकारचा विनापरवानगी जाहिरात फलक लावला जाऊ नये, असे आदेश दिले होते. पालिकेने हे आदेश नागरिक, व्यापारी आणि सर्व राजकीय पक्षांच्या निदर्शनास वेळोवेळी आणून दिले होते. तरीसुद्धा विविध ठिकाणी अनधिकृत फलक व होर्डिंग्ज उभारले जात असल्याचे लक्षात आले.
त्यामुळे महापालिका आय़ुक्तांच्या आदेशानंतर अतिरिक्त आयुक्त डॉ. धीरज चव्हाण यांच्या मार्गदर्शनाखाली झालेल्या या मोहिमेत प्रभाग समिती क्रमांक १ ते ४ अंतर्गत १३ गुन्हे दाखल करण्यात आले आहे. यात उल्हासनगर पोलीस ठाण्यात ६, मध्यवर्ती पोलीस ठाण्यात २, विठ्ठलवाडी पोलीस ठाण्यात ३, हिललाईन पोलीस ठाण्यात २ असे एकूण १३ गुन्हे नोंदवले गेले आहेत. यामुळे बेकायदेशीर जाहिरात फलकबाजी करणाऱ्यांचे धाबे दणाणले आहेत.
नियमित मोहीम सुरू राहणार
महानगरपालिका क्षेत्रात आता अशा प्रकारची बेकायदेशीर होर्डिंग्ज व फलक आढळल्यास तत्काळ कारवाई केली जाईल, असे प्रशासक तथा आयुक्त यांनी स्पष्ट केले आहे. सहायक आयुक्तांना दररोज पथके उतरवून अनधिकृत जाहिरात फलकांवर कारवाई करण्याचे आदेश देण्यात आले आहेत. या कारवाईमुळे शहरातील सौंदर्य आणि शिस्त राखण्यास हातभार लागणार असून, नागरिकांनीसुद्धा अशा बेकायदेशीर जाहिरातींना पाठिंबा न देण्याचे आवाहन प्रशासनाकडून करण्यात आले आहे.
