महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी–मार्च २०२६ मध्ये घेण्यात येणाऱ्या उच्च माध्यमिक प्रमाणपत्र (इयत्ता बारावी) परीक्षेसाठीची प्रवेशपत्रे येत्या सोमवारपासून, दिनांक १२ जानेवारीपासून उपलब्ध होणार आहेत. राज्यातील सर्व विभागीय मंडळांअंतर्गत येणाऱ्या उच्च माध्यमिक शाळा आणि कनिष्ठ महाविद्यालयांना ही प्रवेशपत्रे ऑनलाइन पद्धतीने उपलब्ध करून देण्यात येणार असल्याची माहिती राज्य मंडळाचे सचिव डॉ. दीपक माळी यांनी एका प्रकटनाद्वारे दिली आहे.
राज्य मंडळाच्या www.mahahsscboard.in या अधिकृत संकेतस्थळावरून संबंधित शाळा व कनिष्ठ महाविद्यालयांनी विद्यार्थ्यांची प्रवेशपत्रे डाउनलोड करून त्यांची छायांकित प्रत विद्यार्थ्यांना द्यायची आहे. प्रवेशपत्र देताना विद्यार्थ्यांकडून कोणतेही अतिरिक्त शुल्क आकारू नये, असे स्पष्ट निर्देश राज्य मंडळाने दिले आहेत. तसेच, प्रवेशपत्राच्या छायांकित प्रतीवर संबंधित मुख्याध्यापक किंवा प्राचार्य यांचा शिक्का व स्वाक्षरी असणे बंधनकारक राहणार आहे.
प्रवेशपत्रावरील छायाचित्र अस्पष्ट किंवा सदोष असल्यास संबंधित विद्यार्थ्याचे योग्य छायाचित्र प्रवेशपत्रावर चिकटवून त्यावर मुख्याध्यापक किंवा प्राचार्य यांनी शिक्का मारून स्वाक्षरी करावी, असेही सूचित करण्यात आले आहे. तसेच, विद्यार्थ्याचे प्रवेशपत्र गहाळ झाल्यास संबंधित शाळा किंवा कनिष्ठ महाविद्यालयाने पुन्हा एकदा छायांकित प्रत काढून त्यावर लाल शाईने ‘द्वितीय प्रत’ असा शेरा देऊन विद्यार्थ्याला प्रवेशपत्र द्यावे, असेही राज्य मंडळाने स्पष्ट केले आहे.
दरम्यान, बारावीच्या परीक्षेचे वेळापत्रकही जाहीर करण्यात आले आहे. सर्वसाधारण, द्विलक्षी (ड्युअल) आणि व्यवसाय अभ्यासक्रमांच्या लेखी परीक्षा १० फेब्रुवारी ते १८ मार्च २०२६ या कालावधीत होणार आहेत. त्याचबरोबर प्रात्यक्षिक, श्रेणी, तोंडी व अंतर्गत मूल्यमापन तसेच एनएसक्यूएफ अंतर्गत व्यावसायिक अभ्यासक्रमांच्या परीक्षा २३ जानेवारी ते ९ फेब्रुवारी २०२६ या कालावधीत पार पडणार आहेत.
राज्यातील लाखो विद्यार्थी या परीक्षेला बसणार असून, प्रवेशपत्रांबाबत दिलेल्या सूचनांचे काटेकोर पालन करण्याचे आवाहन राज्य मंडळाने शाळा, महाविद्यालये तसेच विद्यार्थ्यांना केले आहे. प्रवेशपत्र वेळेत मिळाल्याची खात्री करून विद्यार्थ्यांनी परीक्षेच्या तयारीवर लक्ष केंद्रित करावे, असेही मंडळाकडून सांगण्यात आले आहे.
