बदलापूर : क्रीडा व युवक सेवा संचालनालय आणि कुळगाव-बदलापूर नगरपरिषद यांच्या संयुक्त विद्यमाने आयोजित करण्यात आलेल्या छत्रपती शिवाजी महाराज चषक राज्यस्तरीय व्हॉलीबॉल स्पर्धेत मुंबई, कोल्हापूर, पुणे आणि लातूर संघांनी विविध गटांमध्ये विजेतेपद पटकावत आपला दबदबा सिद्ध केला. बदलापूर जिमखाना मैदानावर विद्युत प्रकाशझोतात रंगलेल्या या स्पर्धेत राज्यातील आठ विभागांतील ३८४ खेळाडूंनी सहभाग घेत क्रीडारसिकांना थरारक सामने अनुभवायला दिले.
१८ वर्षांखालील मुलांच्या गटात कोल्हापूरने नागपूरवर २३-२५, २७-२५, २१-२५, २५-२० व १५-१२ अशा फरकाने मात करत विजेतेपद पटकावले. पहिला सेट गमावल्यानंतर कोल्हापूरच्या संघाने दमदार पुनरागमन केले. निर्णायक सेटमध्ये वैभव ढगेच्या अप्रतिम फटक्याने सामन्याचे पारडे फिरले. उत्कर्ष पाटील, संजोग पाटील आणि जुनेद शेख यांच्या वेगवान खेळामुळे कोल्हापूरने विजेतेपदावर नाव कोरले. आंतरराष्ट्रीय मार्गदर्शक अजीत पाटील यांच्या अचूक मार्गदर्शनाचा संघाला मोठा फायदा झाला.
२१ वर्षांखालील मुलींच्या गटात मुंबईने नाशिकचा १६-२५, २५-१८, २५-१९, २५-२१ असा पराभव करून विजेतेपद पटकावले. शिवप्रिया पनीकर, दिव्या मेहता आणि वेदिका सामगिर यांनी उत्कृष्ट खेळ करत पिछाडीवर असलेल्या संघाला विजय मिळवून दिला. तर १८ वर्षांखालील मुलींच्या गटात पुण्याने नागपूरचा २५-१९, २५-१८, २५-१६ असा सरळ सेटमध्ये पराभव करत विजेतेपद मिळवले. साक्षी साळुंखे, वैष्णवी अडलिंगे आणि श्रेया चव्हाण यांनी आक्रमक खेळ करत संघाला विजय मिळवून दिला.
२१ वर्षांखालील मुलांच्या गटातील अंतिम सामना रात्री अडीच वाजेपर्यंत रंगला. लातूरने मुंबईवर २५-१६, १५-२५, २५-२१, २५-१९ असा विजय मिळवत तिसऱ्यांदा विजेतेपदावर मोहोर उमटवली. निर्भय देशमुख, शेहराज खान आणि आफताब कुरेशी यांनी आक्रमक खेळ करत प्रेक्षकांची मने जिंकली. स्पर्धेतील विजेत्या संघांना एकूण २३ लाख ३५ हजार रुपयांची रोख बक्षिसे, करंडक आणि पदके प्रदान करण्यात आली.
दरम्यान, पाच दिवस चाललेल्या या स्पर्धेला बदलापूरकरांचा उत्स्फूर्त प्रतिसाद लाभला. रविवारी सायंकाळपासूनच बदलापूर जिमखाना मैदान प्रेक्षकांनी फुलून गेले होते. रात्री अडीच वाजेपर्यंत आबालवृद्धांनी राज्यस्तरीय व्हॉलीबॉलचा थरार अनुभवला. क्रीडाप्रेमी नगरसेवक किरण भोईर यांनी प्रेक्षक गॅलरीत जाऊन केलेल्या समालोचनामुळे स्पर्धेची रंगत अधिकच वाढली.
