सातारा : ५२ व्या हिंद केसरी कुस्ती स्पर्धेत सोलापूरच्या महेंद्र गायकवाड ऊर्फ बाहुबली याने दमदार कामगिरी करत प्रतिष्ठेची ‘हिंद केसरी’ गदा पटकावली. अंतिम फेरीत पुण्याच्या पृथ्वीराज मोहोळविरुद्ध रंगलेल्या लढतीत पृथ्वीराजला दुखापत झाल्याने त्याने माघार घेतली आणि महेंद्रला विजयी घोषित करण्यात आले. महाराष्ट्र केसरी किताबाने वारंवार हुलकावणी दिलेल्या महेंद्रने अखेर यंदाच्या हिंद केसरी स्पर्धेत सुवर्ण अक्षरांनी नाव कोरले. तर महाराष्ट्र केसरीसह हिंद केसरी होण्याचे पृथ्वीराजचे स्वप्न अपुरेच राहिले.
महेंद्र हा महाराष्ट्राचा दहावा, तर देशाचा ३९ वा हिंद केसरी ठरला. यापूर्वी श्रीपती खंचनाळे, गणपतराव आंधळकर, मारुती माने, हजरत पटेल, दीनानाथ सिंह, चंबा मुतनाळ, विनोद चौगुले, योगेश दोडके आणि अभिजित कटके यांनी महाराष्ट्रासाठी ही मानाची गदा जिंकली होती. महिला गटात हरियानाच्या काजल धोचक हिने दिल्लीच्या खुशी दलालला चीतपट करत महिला हिंद केसरी किताब पटकावला. तर डबल महाराष्ट्र केसरी अमृता पुजारी हिने कांस्यपदकावर नाव कोरले.
राजेश्वर प्रतिष्ठान आणि तालीम संघाच्या वतीने साहेबराव पवार शतकपूर्ती वर्षानिमित्त आयोजित या स्पर्धेत देशभरातील नामांकित मल्लांनी सहभाग घेतला होता. महेंद्रने उपांत्य फेरीत दिल्लीच्या अनिरुद्ध कुमारवर ९-७ अशा फरकाने मात करत अंतिम फेरी गाठली. चुरशीच्या या लढतीत महेंद्रने अखेरच्या क्षणी अप्रतिम डाव टाकत विजय मिळवला. दुसऱ्या उपांत्य फेरीत पृथ्वीराज मोहोळने एनसीआरच्या रजतवर मात करत अंतिम फेरीत प्रवेश केला होता.
अंतिम लढतीत सुरुवातीच्या काही सेकंदांतच महेंद्रने आक्रमक पवित्रा घेतला. डाव साधताना पृथ्वीराजच्या हाताला दुखापत झाली आणि काही वेळ कुस्ती थांबवण्यात आली. त्यानंतर पुन्हा सामना सुरू झाला; मात्र दुखापतीमुळे पृथ्वीराजला माघार घ्यावी लागली. त्यामुळे महेंद्रला हिंद केसरी घोषित करण्यात आले. अंतिम सामन्यानंतर मैदानात एकच जल्लोष उसळला.
दरम्यान, या स्पर्धेत ट्रिपल महाराष्ट्र केसरी विजय चौधरीच्या पराभवाने भावनिक वातावरण निर्माण झाले. महेंद्रकडून पराभव पत्करल्यानंतर विजय चौधरी यांना अश्रू अनावर झाले. गेली १७ वर्षे मैदान गाजवणाऱ्या विजयने पोलिस दलात एसीपी पदापर्यंत मजल मारली आहे. त्याच्या पराभवानंतर कुस्ती शौकिनांनीही हळहळ व्यक्त केली. तसेच पृथ्वीराज मोहोळच्या पराभवानंतर त्याच्या चाहत्यांच्याही डोळ्यांत अश्रू तरळले.
