मुंबई : विद्याविहार स्थानकाच्या मध्यभागी उभारण्यात येणाऱ्या पादचारी पुलाच्या गर्डर स्थापनेसाठी मध्य रेल्वेकडून सलग तीन रात्री विशेष मेगाब्लॉक जाहीर करण्यात आला आहे. आज, शुक्रवार मध्यरात्रीनंतर या ब्लॉकला सुरुवात होणार असून कुर्ला ते भांडुपदरम्यान अप-डाउन धीम्या व जलद मार्गांसह पाचव्या आणि सहाव्या मार्गिकेवर हा ब्लॉक घेण्यात येणार आहे.
१५ ते १८ मेदरम्यान होणाऱ्या या ब्लॉकमुळे उशिरा धावणाऱ्या लोकल तसेच काही मेल-एक्स्प्रेस गाड्यांच्या वेळापत्रकावर परिणाम होणार आहे. छत्रपती शिवाजी महाराज टर्मिनसहून कर्जतकडे जाणाऱ्या डाउन धीम्या लोकल रात्री ११.३० ते १२.१२ या वेळेत माटुंगा ते मुलुंडदरम्यान डाउन जलद मार्गावरून धावतील. तसेच कसारा, बदलापूर, कर्जत आणि अंबरनाथ येथून सीएसएमटीकडे येणाऱ्या काही लोकल अप जलद मार्गावर वळवण्यात येणार आहेत.
ब्लॉक कालावधीत दोन्ही दिशेतील लोकल नाहूर, कांजूरमार्ग आणि विद्याविहार स्थानकांवर थांबणार नाहीत. याशिवाय ठाणे-कुर्ला आणि ठाणे-सीएसएमटी मार्गावरील काही सामान्य व वातानुकूलित लोकल फेऱ्या रद्द करण्यात आल्या आहेत.
रेल्वे प्रशासनाच्या माहितीनुसार शनिवारी मध्यरात्रीनंतर होणाऱ्या ब्लॉकमध्ये मेल, एक्स्प्रेस आणि लोकल सेवांवर विशेष परिणाम होणार नाही. तर रविवारी मध्यरात्रीनंतरच्या ब्लॉकमध्ये लोकल सेवा सुरळीत राहणार असल्याचे सांगण्यात आले.
ब्लॉकची वेळ
१५/१६ मे (शुक्रवारी मध्यरात्रीनंतर) : पहाटे १.१५ ते ४.१५
१६/१७ मे (शनिवारी मध्यरात्रीनंतर) : रात्री १२.१० ते पहाटे ४.४०
१७/१८ मे (रविवारी मध्यरात्रीनंतर) : पहाटे १.१५ ते ३.०५
दादर स्थानकात पाच तासांचा ब्लॉक
दरम्यान, पश्चिम रेल्वेच्या दादर स्थानकात अप आणि डाउन धीम्या मार्गिकांवर इलेक्ट्रॉनिक इंटरलॉकिंगच्या कामासाठी आज, शुक्रवारी मध्यरात्रीनंतर १२ ते पहाटे ५ वाजेपर्यंत विशेष ब्लॉक घेण्यात येणार आहे.
ब्लॉक कालावधीत धीम्या मार्गावरील सर्व लोकल जलद मार्गावरून चालवण्यात येतील. फलाट उपलब्ध नसल्यामुळे महालक्ष्मी, लोअर परळ, माटुंगा रोड, प्रभादेवी आणि माहीम स्थानकांवर लोकल थांबणार नाहीत.
प्रवाशांच्या सोयीसाठी चर्चगेटहून रात्री ११.३१ वाजता सुटणारी वांद्रे लोकल विरारपर्यंत वाढवण्यात आली आहे. तसेच बोरिवलीहून चर्चगेटकडे जाणारी शेवटची लोकल रात्री ११.३० वाजता रवाना होणार असल्याची माहिती पश्चिम रेल्वेकडून देण्यात आली.
