कल्याण पश्चिम आणि पूर्वेला जोडणाऱ्या वालधुनी उड्डाणपुलाच्या डांबरीकरण आणि दुरुस्तीच्या कामासाठी आज, 20 डिसेंबरच्या रात्रीपासून पुढील 20 दिवस म्हणजेच 10 जानेवारी 2026 पर्यंत हा पूल बंद ठेवण्यात येणार आहे. वाहतूक शाखेचे पोलिस उपायुक्त पंकज शिरसाट यांनी अधिसूचनेद्वारे ही माहिती दिली. शाळांना असणारी नाताळची सुट्टी लक्षात घेऊन दुरुस्तीचे नियोजन केल्याचे पालिका प्रशासनाने सांगितले.
कल्याण पूर्वेकडून पर्यायी मार्ग
याकाळात कल्याण पूर्वेकडून स्व. आनंद दिघे पुलावरून कल्याण पश्चिमेकडे वालधुनी पुलावरून येणाऱ्या सर्व वाहनांना सम्राट चौक (डॉ. आंबेडकर चौक) येथे ‘प्रवेश बंद’ केला आहे. ही वाहने सम्राट चौकात उजवे वळण घेवुन पुढे शांतीनगर उल्हासनगरमार्गे इच्छित स्थळी जातील.
उल्हासनगरमधून पर्यायी मार्ग
उल्हासनगरहून वालधुनी पुलावरून कल्याण पश्चिमकडे येणाऱ्या सर्व वाहनांना सम्राट चौकात ‘प्रवेश बंद’ करून, डावीकडे वळून पुढे स्व. आनंद दिघे पुलावरून इच्छित स्थळी पाठवले जाईल.
कल्याण पश्चिमकडील पर्यायी मार्ग
कल्याण पश्चिम वालधुनी पुलावरून सम्राट चौकामार्गे उल्हासनगर आणि स्व. आनंद दिघे पुलावरून कल्याण पूर्वेकडे जाणाऱ्या वाहनांना सुभाष चौकात ‘प्रवेश बंद’ करून, सरळ पुढे, कर्णिक रोड, प्रेम ऑटो येथे उजवीकडे वळून शहाड पुलामार्गे पाठवले जाईल.
कल्याणमध्ये रिंगरोड, मेट्रोचं काम प्रगतीपथावर
दरम्यान, कल्याणमध्ये रिंगरोड तयार केला जात आहे. दुर्गाडी ते मोठागाव माणकोली या सर्वात मोठ्या टप्प्याचं काम लवकरच पूर्ण करण्याचं ‘एमएमआरडीए’ कडून सांगण्यात आलं आहे. या रिंगरोडमुळे कल्याण ते मोठागाव अंतर 10 मिनिटांत गाठता येणार आहे. या रिंगरोडमुळे कल्याण आणि ठाण्यातील अंतरही कमी होण्यास मदत होईल.
त्याशिवाय ठाणे ते कल्याण मेट्रोदेखील धावणार आहे. या मार्गिकेचा कल्याण-ठाणेवरुन मार्ग ठाण्यातील कापूरबावडी जंक्शन ते कल्याणमधील कृषी उत्पन्न बाजार समिती असा आहे. कल्याण-ठाणे या उन्नत मार्गिकेसाठी जवळपास 292 बांधकामं पाडली जाणार आहेत. या सुविधांमुळे कल्याणकरांना प्रवासासाठी मोठी सुविधा उपलब्ध होणार आहे.
