बदलापूरमध्ये १०० वर्षांहून अधिक वयाचे तब्बल ६० मतदार ! – प्रारूप मतदार यादीवर हरकतींसाठी शेवटची तारीख १७ ऑक्टोबर
बदलापूर – कुळगाव-बदलापूर नगरपालिका सार्वत्रिक निवडणूक 2025 साठी प्रसिद्ध झालेल्या प्रारूप मतदार यादीत अनेक आश्चर्यजनक बाबी समोर येत आहेत. विशेष म्हणजे, यादीमध्ये तब्बल ६० मतदार शंभर वर्षे किंवा त्यापेक्षा अधिक वयाचे असल्याचे आढळून आले आहे. त्यामुळे या यादीच्या अचूकतेबाबत प्रश्नचिन्ह उपस्थित केले जात असून, स्थानिक राजकीय वर्तुळात जोरदार चर्चा सुरु झाली आहे.
या मतदार यादीविषयी हरकती व सूचना नोंदविण्याची अंतिम तारीख १७ ऑक्टोबर २०२५ अशी जाहीर करण्यात आली आहे. नागरिकांनी वेळेत आपली नोंदणी, दुरुस्ती किंवा हरकती अर्ज सादर करण्याचे आवाहन प्रशासनाकडून करण्यात आले आहे.
दरम्यान, राज्याच्या राजकारणात सध्या मतदार यादी हा मोठा चर्चेचा विषय ठरत आहे. महाविकास आघाडी आणि महाराष्ट्र नवनिर्माण सेनेचे नेते यासंदर्भात निवडणूक आयोगाच्या अधिकाऱ्यांची भेट घेऊन मतदार यादीतील अनियमितता दूर करण्याची मागणी करत आहेत.
प्रारूप यादीतील आणखी एक लक्षवेधी बाब म्हणजे, ८० वर्षांपेक्षा अधिक वयाचे मतदार ३,००० हून अधिक असल्याची माहिती चर्चेत आहे. ही संख्या वास्तविकतेशी कितपत सुसंगत आहे, याबाबत संशय व्यक्त केला जात आहे.
निवडणूक प्रक्रियेच्या पारदर्शकतेसाठी नागरिकांनी यादीतील माहिती तपासून आपले हरकती व सूचना नोंदवाव्यात, असे आवाहन प्रशासनामार्फत करण्यात आले आहे. यादीत झालेल्या त्रुटींमुळे खोटे नाव, एकाच व्यक्तीची अनेक नावे, किंवा मृत व्यक्तींची नावे कायम असल्याच्या तक्रारी आधीही प्राप्त झाल्या आहेत.
आता या १०० वर्षांपेक्षा जास्त वयाच्या ६० मतदारांची नावे कशा आधारावर यादीत आहेत, त्यांची पडताळणी केली जाते का, आणि अंतिम यादीत ही नावे राहतात का, याकडे सर्वांचे लक्ष लागून आहे.
प्रभाग निहाय मतदार संख्या (१०० व त्यापेक्षा वर्षांपेक्षा जास्त )
प्रभाग क्रमांक. संख्या
प्रभाग २ ०२
प्रभाग ४. ०३
प्रभाग ५. ०४
प्रभाग ६. ०१
प्रभाग ७. ०२
प्रभाग १०. ०१
प्रभाग १२. ०४
प्रभाग १३. ०३
प्रभाग १४. ०९
प्रभाग १५. ०५
प्रभाग १६. ०१
प्रभाग १७. ०३
प्रभाग १८. ०३
प्रभाग १९. ०१
प्रभाग २०. ०७
प्रभाग २१. ०३
प्रभाग २२. ०६
प्रभाग २४. ०२
