महाराष्ट्र इमारत व इतर बांधकाम कामगार कल्याणकारी मंडळांतर्गत चालवल्या जाणाऱ्या शिष्यवृत्ती योजना अर्ज प्रक्रिया आणि बँक खात्यात निधी हस्तांतरण यासंदर्भात काही खोटी आणि दिशाभूल करणारी माहिती YouTube वर प्रसारित केली जात असल्याचे समोर आले आहे.
याबाबत मंडळाने स्पष्टीकरण देताना सांगितले की ‘Brown Mulga’ या YouTube चॅनेलवर प्रसारित करण्यात आलेला बांधकाम कामगारांसाठी e-KYC हा व्हिडिओ पूर्णपणे चुकीच्या माहितीवर आधारित आहे.
मंडळाने स्पष्ट केले आहे की, उद्योग, ऊर्जा, कामगार व खनिकर्म विभागाने e-KYC संदर्भात ५ नोव्हेंबर २०२५ किंवा ११ नोव्हेंबर २०२५ रोजी कोणताही शासन निर्णय जारी केलेला नाही. तसेच या विषयावर मंडळाच्या अधिकृत संकेतस्थळावर (www.mahabocw.in) कोणतेही परिपत्रक किंवा सूचना प्रसिद्ध करण्यात आलेल्या नाहीत.
मंडळाच्या माहितीनुसार, सध्या बांधकाम कामगारांची नोंदणी मंडळाच्या एकात्मिक संगणक प्रणालीवरून ऑनलाईन पद्धतीने केली जाते. नोंदित आणि सक्रिय (जीवित) बांधकाम कामगारांना पात्रतेनुसार मंडळाच्या विविध कल्याणकारी योजनांचा मोफत लाभ दिला जातो.
मंडळाने सर्व बांधकाम कामगारांना आवाहन केले आहे की, कोणत्याही अफवा किंवा खोट्या व्हिडिओंवर विश्वास ठेवू नये. अधिकृत आणि विश्वसनीय माहितीसाठी नेहमीच मंडळाचे www.mahabocw.in हे संकेतस्थळ किंवा नजीकचे तालुका सुविधा केंद्र यांच्याशी संपर्क साधावा.
