अहमदाबादमध्ये एअर इंडियाचं प्रवासी विमान कोसळल्याची मोठी दुर्घटना घडली. अहमदाबादहून लंडनला जाणाऱ्या या विमानात क्रू मेंबरसह एकूण २४२ प्रवासी होते. विमानानं अहमदाबाद विमानतळावरुन उड्डाण घेतल्याच्या काहीच मिनिटांत ते खाली कोसळलं. पण त्याही परिस्थितीत वैमानिकानं MAYDAY कॉल दिला होता अशी माहिती समोर आली आहे. त्यामुळे विमानात काहीतरी गडबड आहे याची कल्पना वैमानिकाला आली होती. हाच MAYDAY कॉल म्हणजे नेमकं काय असतं? तो का दिला जातो? त्याचा अर्थ काय असतो? याची माहिती जाणून घेऊयात…
मेडे कॉल (MAYDAY) हा शब्द विमान वाहतूक क्षेत्रात संकटाचा इशारा म्हणून आंतरराष्ट्रीय स्तरावर ओळखला जातो .अत्यंत आपत्कालीन परिस्थितीत जिथे धोक्याची शक्यता वाटते, तिथे वैमानिक मेडे कॉल देतो. विमान वाहतुकीच्या क्षेत्रात मेडे कॉल हा तात्काळ गंभीर संकटाचा इशारा मानला जातो . हा एक रेडिओद्वारे दिला जाणारा सिग्नल आहे, जो खूप गंभीर परिस्थितीत, जीवाला धोका असल्यास वापरला जातो. तो तीन वेळा दिला जातो. कारण यामुळे स्पष्ट होतं की हा विनोद किंवा चुकीचा कॉल नाही, तर खरी आपत्ती आहे. विमान किंवा जहाज अपघाताच्या उंबरठ्यावर असेल, इंधन संपण्याची स्थिती, इंजिन फेल होणे, हवामान खराब होऊन विमानाचे नियंत्रण गमावणे, आग लागणे, प्राणघातक वैद्यकीय आपत्ती, दहशतवादी हल्ला किंवा विमान अपहरण या गंभीर परिस्थितींमध्ये हा कॉल दिला जातो . MAYDAY कॉलचा उद्देश हा जवळच्या ATC (Air Traffic Control) किंवा नौदल नियंत्रणेला लगेच सतर्क करणे असा असतो. जेणेकरुन तातडीने मदत मिळावी. जसे की रेस्क्यू टीम, अग्निशमन दल आणि इतर तांत्रिक यंत्रणा तातडीने घटनास्थळी पोहोचाव्यात यासाठी या कॉलची मदत होते. यासोबत त्या परिघात इतर विमानांच्या वाहतूक रोखण्यासाठीही अलर्ट या माध्यमातून मिळतो.
