बदलापूर : येथील नगरपरिषद कर संकलन प्रक्रियेत आता अधिक पारदर्शकता आणि गती येणार आहे. इंडियन बँकेकडून सीएसआर निधीअंतर्गत २ पीओएस मशीन प्राप्त झाल्या आहेत त्यामुळे शहरातील करदात्यांना आता कर भरणा करताना येणाऱ्या अडचणी कमी होऊन कर संकलन प्रक्रियेत पारदर्शकता आणि गती येणार असून नागरिकांना कर भरणा करताना डिजिटल सुविधा मिळणार आहे.
इंडियन बँक, बदलापूर शाखेकडून कॉर्पोरेट सोशल रिस्पॉन्सिबिलिटी (CSR) निधीअंतर्गत कुळगाव-बदलापूर नगरपरिषदेस दोन पीओएस (Point of Sale) मशीन मिळाल्या आहेत. नगरपरिषदेच्या ही पीओएस उपकरणे घरपट्टी व इतर कर भरण्यासाठी वापरली जाणार आहेत. यामुळे नागरिकांना नगरपरिषद कार्यालयातच डेबिट/क्रेडिट कार्ड/UPI द्वारे सहज व सुरक्षित व्यवहार करता येणार आहे.
इंडियन बँकेच्या या उपक्रमामुळे डिजिटायझेशन व ‘नगदी विरहित व्यवहार’ या केंद्र व महाराष्ट्र शासनाच्या अभियानास बळकटी मिळणार आहे.नगरपरिषदेच्या वतीने इंडियन बँक, बदलापूर शाखेचे या सहकार्याबद्दल मन:पूर्वक आभार व्यक्त करण्यात आले आहेत.
सदरचे पीओएस (Point of Sale) मशीन मा. मुख्याधिकारी मारुती गायकवाड यांच्या वतीने उपमुख्याधिकारी केतन गुजर यांनी स्वीकारले यावेळी लेखापाल ,लेखापरीक्षक , कर अधिकारी व इंडियन बँकेचे शाखा अधिकारी श्री.सिंग व श्री. ठोंबरे उपस्थित होते.
मुख्याधिकारी व प्रशासन विभागाने नागरिकांना या डिजिटल सुविधेचा लाभ घेण्याचे आवाहन केले आहे.
