बदलापूर :- नगरपरिषद महासघाच्या अध्यक्षपदी बदलापूरच्या नगराध्यक्षा सौ. रुचिता राजेंद्र घोरपडे यांची एकमताने निवड झाली आहे. चंद्रपूर जिल्ह्यातील राजुरा नगर परिषदेचे नगराध्यक्ष अरुण धोटे यांची उपाध्यक्षपदी निवड जाहीर झाली आहे.
राज्यातील सुमारे ३५० पेक्षा अधिक नगरपरिषद, नगरपालिका आणि नगरपंचायतींचे प्रतिनिधित्व कराया नगराध्यक्ष महासंघाच्या नेतृत्वात महत्त्वपूर्ण बदल घडला आहे. बदलापूरच्या नगराध्यक्षा सौ. रुचिता घोरपडे यांची अध्यक्षपदी एकमताने निवड करण्यात आली आहे. बदलापूर शहरासाठी ही अभिमानास्पद बाब मानली जात आहे.
महाराष्ट्र नगराध्यक्ष महासंघ हा राज्यातील नगरपरिषद, नगरपालिका आणि नगरपंचायतींच्या प्रमुखांना एकत्र आणणारा प्रभावी मंच म्हणून ओळखला जातो. सुमारे साडेतीनशेहून अधिक शहरांचे प्रतिनिधित्व करणाऱ्या या संघटनेच्या माध्यमातून पाणीपुरवठा, कचरा व्यवस्थापन, पायाभूत सुविधा, निधीवाढ आणि स्थानिक स्वराज्य संस्थांच्या अधिकार वाढीसाठी सातत्याने पाठपुरावा केला जातो. सौ. रुचिता घोरपडे यांच्या अध्यक्षतेखाली आणि अरुण धोटे यांच्या उपाध्यक्षपदाच्या साथीत महासंघ अधिक संघटित आणि आक्रमक पद्धतीने काम करेल, अशी अपेक्षा व्यक्त होत आहे.
महासंघाच्या अध्यक्षपदी निवड झाल्याबद्दल नगराध्यक्षा सौ. रुचिता घोरपडे यांचे अभिनंदन करण्यात आले. याप्रसंगी अंबरनाथच्या नगराध्यक्षा सौ. तेजश्री विश्वजीत करंजुले, बदलापूरचे माजी नगराध्यक्ष राजेंद्र घोरपडे, गटनेते शरद तेली, सभापती संभाजी शिंदे आदी उपस्थित होते.
