माजी केंद्रीय राज्यमंत्री कपिल पाटील यांच्या मागणीनंतर कार्यवाही
शहापूर, दि. ३१ (प्रतिनिधी) : शहापूर येथील उपजिल्हा रुग्णालयात वेळेवर उपचार न झाल्यामुळे १४ वर्षांच्या मुलाचा मृत्यू झाला असल्याच्या पार्श्वभूमीवर माजी केंद्रीय राज्यमंत्री कपिल पाटील यांनी आज दुपारी अचानक रुग्णालयाला भेट देऊन पाहणी केली. तसेच या ठिकाणी अतिदक्षता कक्ष सुरू करण्याची केलेली मागणी आरोग्य विभागाने मान्य केली असून, कार्यवाही सुरू केली आहे.
शहापूर तालुक्यातील पेंढरघोळ येथील प्रेम लहानू सदगीर याला मित्रांसोबत क्रिकेट खेळत असताना सर्पदंश झाला. त्याला तातडीने शहापूर येथील उपजिल्हा रुग्णालयात आणण्यात आले. तेथे डॉक्टरांनी उपचार सुरू केले. मात्र, त्याचा मृत्यू झाला. तो सदगीर यांचा एकुलता एक मुलगा होता. या रुग्णालयातील डॉक्टरांनी वेळीच उपचार न केल्यामुळे मुलाचा मृत्यू झाला असल्याचा आरोप नातेवाईकांनी केला होता.
या पार्श्वभूमीवर शहापूरच्या दौऱ्यात उपजिल्हा रुग्णालयाला भेट दिली. तेथील परिस्थितीची पाहणी करून उपलब्ध सुविधांचा आढावा घेतला. त्यानंतर आरोग्य विभागाचे उपसंचालक डॉ. अशोक नांदापूरकर, जिल्हा शल्यचिकित्सक डॉ. कैलास पवार यांच्याबरोबर दूरध्वनीवरुन चर्चा केली. तसेच उपजिल्हा रुग्णालयात लवकरात लवकर अतिदक्षता कक्ष सुरू करण्याची मागणी केली. त्याला दोन्ही अधिकाऱ्यांनी सकारात्मक प्रतिसाद देऊन सोमवारपर्यंत तत्काळ तांत्रिक मंजुरीसह कार्यवाही करण्याचे आश्वासन दिले.
या वेळी माजी आमदार पांडुरंग बरोरा, भाजपाचे तालुकाध्यक्ष भास्कर जाधव, उपशहराध्यक्ष मनोज पानसरे, नगरसेवक योगेश महाजन, प्रमोद बसवंत, राजदीप जामदार यांच्यासह पदाधिकारी उपस्थित होते.
