ठाणे : कोणी कितीही अफवा पसरवल्या तरी लाडकी बहिण योजना कधीही बंद होणार नाही, असे ठाम आश्वासन उपमुख्यमंत्री एकनाथ शिंदे यांनी ठाण्यात दिले. शिवसेना पुरस्कृत साई दर्शन फाउंडेशनतर्फे आयोजित महिला बचत गट स्नेहसंमेलन–२०२५ या कार्यक्रमात ते बोलत होते.
कार्यक्रमादरम्यान त्यांनी महिलांशी संवाद साधताना सांगितले की, लाडक्या बहिणींच्या आशिर्वादामुळेच मला सव्वा लाख मतांच्या आघाडीने विजय मिळाला. त्यांच्याच आशीर्वादाने मी आमदार झालो आणि पुढे राज्याचा मुख्यमंत्री म्हणूनही काम करण्याची संधी मिळाली.
शिंदे पुढे म्हणाले, लाडकी बहिण योजनेमुळे अनेक महिलांनी छोटे–मोठे व्यवसाय सुरू केले. महिलांना कुटुंबात मान वाढला आणि आर्थिक सक्षमीकरणाचा मार्ग मोकळा झाला.
महिलांना लखपती बनवण्याचा संकल्प सरकारने केल्याचे सांगत त्यांनी या योजनेला अधिक बळकट करण्यासाठी महिलांच्या सहकार्याची आवश्यकता व्यक्त केली.
आगामी स्थानिक स्वराज्य संस्थांच्या निवडणुकीचा उल्लेख करत शिंदे म्हणाले, राज्यातील महिला आणि नागरिकांनी महायुतीला दिलेली साथ पुढेही कायम राहील, अशी अपेक्षा आहे.
