बदलापूर (प्रतीक टोपले ): बदलापुरातील प्रसिद्ध देवस्थान म्हणून ओळखला जाणारा पश्चिमेतील‘श्री क्षेत्र खंडोबा मंदिर मुळगाव’ येथे आज पौष पौर्णिमेच्या शुभ मुहूर्तावर श्री खंडोबा व म्हाळसादेवी यांचा पवित्र विवाह सोहळा पार पडणार असून हा विवाह सोहळा सायंकाळी ५ वाजून ५ मिनिटांच्या शुभमुहूर्तावर पार पडणार आहे.
हा विवाह सोहळा मुळगाव येथील गडावर पार पडणार असून कार्यक्रमाचे आयोजन येळकोट येळकोट जय मल्हार सेवा संघ मुळगाव परिसर, माजी सरपंच हनुमान भोईर तसेच भोईर कुटुंब यांच्या वतीने करण्यात आले आहे. विवाहानंतर सायंकाळी सहा वाजता महाप्रसादाचे आयोजन करण्यात आले असून भाविकांनी मोठ्या संख्येने महाप्रसादाचा लाभ घ्यावा असे आवाहन आयोजक हनुमान भोईर यांच्याकडून करण्यात आले आहे.
मुळगाव गावातील खंडोबा देवस्थान हे एक जागृत आणि महत्त्वाचे ठिकाण असून हे मंदिर जेजुरी नंतरचे बारा मुख्य खंडेरायाच्या स्थानांपैकी एक मानले जाते. दरवर्षी पौष पौर्णिमेला या ठिकाणी खंडोबा व माळसादेवी यांचे विवाह मोठ्या उत्साहात व ढोल ताशांच्या जल्लोषात साजरा करण्यात येतो. या दिवशी गडाच्या परिसरातील तसेच संपूर्ण ठाणे जिल्ह्यातील हजारो भावी देवाच्या दर्शनासाठी येत असतात.
