महाराष्ट्र राज्यातील महिलांसाठी राबवण्यात येणाऱ्या ‘माझी लाडकी बहीण’ या योजनेबाबत राज्य सरकारने महत्त्वाचा निर्णय घेतला आहे. मकर संक्रांतीच्या मुहूर्तावर पात्र महिलांना दोन महिन्यांचा एकत्रित तीन हजार रुपयांचा हप्ता देण्याची तयारी सरकारने सुरू केली असून, १४ जानेवारीपूर्वी ही रक्कम थेट महिलांच्या बँक खात्यात जमा करण्याचे निर्देश प्रशासनाला देण्यात आले आहेत. या निर्णयामुळे लाखो महिलांना मोठा आर्थिक दिलासा मिळणार आहे.
या योजनेअंतर्गत राज्य सरकारकडून महिलांना दरमहा १,५०० रुपये आर्थिक सहाय्य दिले जाते. मात्र, तांत्रिक अडचणी तसेच निवडणुकांच्या पार्श्वभूमीवर काही लाभार्थ्यांचे हप्ते प्रलंबित राहिले होते. आता मकर संक्रांतीचे औचित्य साधत दोन महिन्यांचा एकत्रित हप्ता देण्याचा निर्णय घेण्यात आला असून, पात्र महिलांच्या खात्यात थेट तीन हजार रुपये जमा केले जाणार आहेत.
ज्या महिलांचे बँक खाते आधारशी लिंक असून केवायसी प्रक्रिया पूर्ण आहे, त्यांनाच या लाभाचे वितरण प्राधान्याने करण्यात येणार आहे. बँक खात्यांशी संबंधित त्रुटी, आधार सीडिंग अपूर्ण असणे किंवा अर्जातील चुका असल्यास संबंधित महिलांनी तातडीने त्या दुरुस्त कराव्यात, असे आवाहन प्रशासनाकडून करण्यात आले आहे.
‘माझी लाडकी बहीण’ योजना महिलांच्या आर्थिक सक्षमीकरणासाठी महत्त्वाची ठरली असून, या योजनेला सुरुवातीपासूनच मोठा प्रतिसाद मिळाला आहे. कोट्यवधी महिलांनी या योजनेसाठी नोंदणी केली असून, आर्थिक मदतीसोबतच महिलांचा आत्मविश्वास वाढवण्यातही ही योजना प्रभावी ठरत असल्याचा दावा राज्य सरकारने केला आहे.
दरम्यान, ज्या महिलांच्या खात्यात अद्याप मागील हप्ते जमा झालेले नाहीत, त्यांनी तातडीने बँकेत जाऊन आधार सीडिंग पूर्ण करावी तसेच ऑनलाइन पोर्टलवर अर्जातील त्रुटी दुरुस्त कराव्यात, असे आवाहन प्रशासनाने केले आहे. सर्व अटी पूर्ण असलेल्या पात्र महिलांच्या खात्यात १४ जानेवारीपूर्वी रक्कम जमा होऊन त्यासंदर्भात बँकेकडून संदेश प्राप्त होईल, अशी अपेक्षा व्यक्त करण्यात येत आहे.
