बदलापूरः अर्ज मागे घेण्याच्या शेवटच्या दिवशी भाजप आणि बहुजन मुक्ती पार्टीच्या उमेदवाराने आपले अर्ज मागे घेतल्याने शिंदेंच्या शिवसेनेचे नगरसेवकाचे खाते उघडले आहे. बदलापुरातील प्रभाग क्रमांक १९ अ च्या उमेदवार शितल प्रविण राऊत या बिनविरोध निवडून आल्या आहेत. तर संपूर्ण शहरात एकूण २२ अर्ज मागे घेण्यात आल्याने १४१ उमेदवार रिंगणात राहिले आहेत.
कुळगाव बदलापूर नगरपालिका निवडणुकांमध्ये शिंदेची शिवसेना आणि भाजपात एकीकडे मोठा संघर्ष सुरू असताना बदलापूर पूर्वेतील प्रभाग क्रमांक १९ अ मध्ये भाजपच्या उमेदवाराने अचानक माघार घेतल्याने आश्चर्य व्यक्त होते आहे. बदलापूर पश्चिमेतील प्रभाग क्रमांक १९ मध्ये शिंदेंच्या शिवसेनेच्या माजी नगरसेविका शितल राऊत अ गटामधून तर शहरप्रमुख वामन म्हात्रे ब गटामधून निवडणुकीच्या रिंगणात होते. राऊत यांच्याविरूद्ध प्रभाग क्रमांक १९ अ मध्ये चार उमेदवारांनी अर्ज भरले होते. त्यात छाननी दरम्यान ठाकरेंच्या शिवसेनेच्या आणि भाजपच्या उमेदवाराचा अर्ज बाद झाला होता. तर बहुजन मुक्ती पार्टीच्या आणि भाजपच्या उमेदवाराचा अर्ज शर्यतीत होता.
शुक्रवारी अर्ज मागे घेण्याच्या दिवशी बहुजन मुक्ती पार्टी आणि भाजपच्या उमेदवाराने अर्ज मागे घेतला. त्यामुळे निवडणुकीसाठी प्रभाग १९ अ मध्ये फक्त शितल राऊत यांचाच अर्ज शिल्लक राहिला, अशी माहिती सहायक निवडणूक निर्णय अधिकारी मारूती गायकवाड यांनी दिली आहे. त्यामुळे शितल राऊत यांची बिनविरोध निवड झाली असल्याचे बोलले जाते. या बिनविरोध निवडीमुळे कुळगाव बदलापूर नगरपालिकेच्या निवडणुकीमध्ये शिवसेनेचे खाते उघडले आहे.
माघारीने वरिष्ठही बुचकळ्यात
शिंदेच्या शिवसेनेची एक जागा बिनविरोध निवडून आल्यानंतर भाजपच्या अनेक वरिष्ठांनी यावर बोलणे टाळले. भाजप उमेदवारो स्वतहून उमेदवारी अर्ज मागे घेतला की भाजपच्या वरिष्ठांच्या सूचनांनुसार हा निर्णय घेतला याबाबत अद्याप स्पष्ट होऊ शकलेले नाही. मात्र यामुळे शिवसेनेला उभारी मिळण्याची आशा आहे.
