बदलापूर : बदलापूर नगरपालिकेच्या नवनिर्वाचित नगराध्यक्षा म्हणून रुचिता घोरपडे यांनी सोमवारी पदभार स्वीकारला.
यावेळी आमदार किसन कथोरे,परशुराम आर्थिक महामंडळाचे अध्यक्ष कॅप्टन आशिष दामले, भाजप व राष्ट्रवादी काँग्रेस पक्षाचे पदाधिकारी, नगरसेवक तसेच मोठ्या संख्येने कार्यकर्ते आणि नागरिक उपस्थित होते. नगराध्यक्षा निवडणुकीत भाजपच्या रुचिता घोरपडे यांनी सुमारे ७ हजार ६३४ मतांनी विजय मिळवला.
पदभार स्वीकारल्यानंतर बोलताना नगराध्यक्षा रुचिता घोरपडे यांनी शहराच्या सर्वांगीण विकासासाठी पारदर्शक आणि लोकाभिमुख कारभार करण्याचे आश्वासन दिले. पाणीपुरवठा, स्वच्छता, रस्ते, वाहतूक कोंडी तसेच रेल्वे उड्डाणपुलासारख्या प्रलंबित प्रश्नांना प्राधान्य देण्यात येईल, असे त्यांनी स्पष्ट केले.
दरम्यान भाजप आणि राष्ट्रवादी काँग्रेसच्या एकूण २५ नगरसेवकांची निवड झाल्याने शहरात आनंदोत्सव साजरा करण्यात आला. बदलापूरच्या विकासाला नवी दिशा मिळेल, असा विश्वास नागरिकांनी व्यक्त केला आहे.
