अंबरनाथ:- येथील कमलधाम वृद्धाश्रमाला ज्येष्ठ अभिनेते, दिग्दर्शक व लेखक प्रदीप कबरे यांनी सदिच्छा भेट दिली. यावेळी त्यांनी आश्रमातील आजी-आजोबांसोबत मनमोकळा वेळ घालवत विविध खेळांमध्ये सहभाग घेतला. त्यांच्या उपस्थितीमुळे आश्रमात आनंददायी वातावरण निर्माण झाले.
अंबरनाथच्या माजी नगराध्यक्षा स्वर्गीय पुर्णिमा कबरे यांची इच्छा होती की प्रदीप कबरे यांनी कमलधाम वृद्धाश्रमाला एकदा भेट द्यावी. त्यांच्या या इच्छेची पूर्तता त्यांच्या कन्या पायल कबरे यांच्या पुढाकारातून करण्यात आली.
याच निमित्ताने पायल कबरे यांच्या पुढाकारातून कमलधाम वृद्धाश्रमात ‘इनडोअर गेम्स रूम’ चे उद्घाटन त्यांच्या हस्ते करण्यात आले. या गेम्स रूममध्ये कॅरम, बुद्धिबळ, लूडो, साप-शिडी, हौजी, पझल्स तसेच बॅडमिंटन यांसारखे विविध खेळ उपलब्ध करून देण्यात आले आहेत.
याप्रसंगी बोलताना प्रदीप कबरे यांनी कमलधाम वृद्धाश्रमाची भरभरून स्तुती केली ते म्हणाले कमलधाम वृद्धाश्रमाला भेट दिल्यानंतर सर्वप्रथम जाणवले ते येथील प्रसन्न वातावरण, इथे राहत असलेल्या ज्येष्ठ नागरिकांची चेहऱ्यावरील समाधान व आनंदी वातावरण. एखाद्या मंदिरासारखे वातावरण येथे मला जाणवले. आज माझ्या हस्ते जो ‘गेमिंग झोन’ इथे सुरू झाला आहे त्यामुळे त्यांच्या आनंदात आता आणखीन भर पडेल यात काही शंका नाही.
“ही केवळ या उपक्रमाची सुरुवात असून पुढील काळात आणखी विविध उपक्रम राबवण्याचा आमचा मानस आहे. आजी-आजोबांच्या मनोरंजनासाठी आणि त्यांच्या मानसिक आरोग्यासाठी हा उपक्रम राबवण्यात येत आहे.” असे पायल कबरे यांनी सांगितले.
