बदलापूर : क्रीडामय वातावरणात बुधवारी (ता. १३) शहर पूर्णपणे न्हाऊन निघाले. निमित्त होते ‘छत्रपती शिवाजी महाराज चषक’ राज्यस्तरीय व्हॉलीबॉल स्पर्धेच्या भव्य उद्घाटनाचे. हेंद्रेपाडा येथील बदलापूर जिमखाना मैदानावर रंगलेल्या या सोहळ्याने क्रीडारसिकांचे विशेष लक्ष वेधून घेतले.
क्रीडा व युवक सेवा संचालनालय, महाराष्ट्र व्हॉलीबॉल असोसिएशन आणि कुळगाव-बदलापूर नगर परिषद यांच्या संयुक्त विद्यमाने आयोजित करण्यात आलेल्या या स्पर्धेचे उद्घाटन आमदार किसन कथोरे यांच्या हस्ते करण्यात आले. यावेळी त्यांनी बदलापूरमध्ये लवकरच अत्याधुनिक इनडोअर स्टेडियम उभारण्यात येणार असल्याची घोषणा करत, ऑलिंपिकसारख्या स्पर्धांमध्ये देशाला यश मिळवून देण्यासाठी अशा क्रीडा स्पर्धांची मोठी गरज असल्याचे सांगितले.उद्घाटन सोहळ्याला नगराध्यक्षा रुचिता घोरपडे , जिल्हाधिकार डॉ.श्रीकृष्ण पांचाळ , मुख्याधिकारी मारुती गायकवाड, माजी नगराध्यक्ष राजेंद्र घोरपडे, महाराष्ट्र व्हॉलीबॉल असोसिएशनचे संजय नाईक, नीलेश जगताप यांच्यासह राज्यातील विविध पदाधिकारी आणि मान्यवर मोठ्या संख्येने उपस्थित होते.
खेळाडूंच्या आकर्षक मिरवणुकीने कार्यक्रमाची सुरुवात झाली. शाहिर नंदेश उमाप यांच्या सांस्कृतिक सादरीकरणाने आणि जिम्नॅस्टिकच्या थरारक प्रात्यक्षिकांनी उपस्थितांची मने जिंकली. नगराध्यक्षा रुचिता घोरपडे यांनी बदलापूर जिमखाना हे शहराचे वैभव असल्याचे सांगत, येथून भविष्यात राष्ट्रीय व आंतरराष्ट्रीय दर्जाचे खेळाडू घडतील, असा विश्वास व्यक्त केला. जिल्हाधिकारी डॉ. पांचाळ यांनी क्रिकेटव्यतिरिक्त इतर खेळांमध्येही करिअरच्या मोठ्या संधी उपलब्ध असल्याचे सांगत युवकांना प्रोत्साहन दिले.
१७ मेपर्यंत रंगणाऱ्या या स्पर्धेत राज्यातील आठ विभागांमधील तब्बल ३८४ खेळाडू सहभागी झाले आहेत. १८ व २१ वर्षांखालील युवकांच्या चुरशीच्या सामन्यांचा थरार प्रथमच बदलापूरकरांना अनुभवता येत आहे. स्पर्धेतील विजेत्यांना २३ लाख ३५ हजार रुपयांची रोख पारितोषिके, करंडक आणि पदके देण्यात येणार आहेत.
कोल्हापूर, लातूर, अमरावती, संभाजीनगर, पुणे, नागपूर, मुंबई आणि नाशिक येथील संघांमध्ये रंगणाऱ्या सामन्यांमुळे शहरात क्रीडारसिकांची मोठी गर्दी होत असून, संपूर्ण बदलापूरमध्ये सध्या क्रीडा उत्सवाचे वातावरण निर्माण झाले आहे.
