बदलापूर, 14 नोव्हेंबर : आगामी कुळगाव–बदलापूर नगरपालिका निवडणुकीत महाविकास आघाडीने तब्बल आठ पक्षांची भक्कम युती उभी करून निवडणूक रणधुमाळीला जोरदार सुरुवात केली आहे. आघाडीची उमेदवार यादी अंतिम टप्प्यात पोहोचली असून, २० प्रभागांमध्ये उमेदवार निश्चित झाले आहेत. उर्वरित चार प्रभागांसाठी उमेदवारांची घोषणा लवकरच केली जाणार असल्याची माहिती शहरप्रमुख किशोर पाटील यांनी पत्रकार परिषदेत दिली.
शहरप्रमुख किशोर पाटील यांनी ठाकरेंच्या शिवसेनेला नगराध्यक्षपदाची उमेदवारी देण्यावर शिक्कामोर्तब झाल्याचे स्पष्ट केले. प्रत्येक प्रभागातील पक्षांची ताकद पाहून जागावाटप करण्यात येत असल्याने आघाडीतील सर्व पक्ष समाधानी असल्याचे त्यांनी सांगितले.
महायुतीमध्ये शिवसेना, भाजप आणि राष्ट्रवादी काँग्रेस पक्ष एकमेकांविरुद्ध आक्रमक प्रचारात उतरले असताना, महाविकास आघाडी मात्र शांत आणि शिस्तबद्ध तयारी करत असल्याचे चित्र दिसत आहे. भिवंडी लोकसभा मतदारसंघात बदलापूरचा समावेश असल्याने, भाजपचे माजी केंद्रीय मंत्री कपिल पाटील यांना पराभूत करणाऱ्या महाविकास आघाडीच्या उमेदवाराचा प्रभाव नगरपालिकेच्या निवडणुकीतही दिसून येईल, असा दावा आघाडीने केला.
महाविकास आघाडीतील आठ पक्षांची अधिकृत घोषणा पत्रकार परिषदेत करण्यात आली. यामध्ये शिवसेना (उद्धव ठाकरे), राष्ट्रवादी काँग्रेस (शरद पवार), काँग्रेस, आम आदमी पार्टी, वंचित बहुजन आघाडी, रिपाई (आर के), बहुजन मुक्ती पार्टी आणि मनसे या पक्षांचा समावेश आहे. शहराचा सर्वांगीण विकास हा या युतीचा प्रमुख अजेंडा असल्याचे पाटील यांनी सांगितले. महायुतीप्रमाणे चिखलफेक न करता विकासाच्या मुद्यांवर निवडणूक लढवू, असे ते म्हणाले.
राष्ट्रवादी काँग्रेसचे अविनाश देशमुख यांनी लोकसभेत केंद्रीय मंत्र्यांचा पराभव घडवून आणल्यानंतर आता महायुतीलाही पराभूत करण्याचे आव्हान स्वीकारल्याचा दावा केला.
संभाव्य जागावाटप जाहीर
महाविकास आघाडीच्या सूत्रांनी दिलेल्या माहितीनुसार, आगामी कुळगाव–बदलापूर नगरपालिका निवडणुकीसाठी संभाव्य जागावाटप निश्चित करण्यात आले आहे. या वाटपात शिवसेना (उद्धव ठाकरे) १२, बहुजन मुक्ती पार्टी ११, राष्ट्रवादी काँग्रेस (शरद पवार) ६, काँग्रेस ५, मनसे ३, तसेच वंचित बहुजन आघाडीला ५ जागा मिळणार आहेत. याशिवाय आम आदमी पार्टीला २ आणि रिपाई (आर के) ला १ जागा देण्यात येणार असल्याची माहिती सूत्रांनी दिली. उर्वरित जागांबाबत निर्णय प्रक्रियेचा अंतिम टप्पा सुरू असून, लवकरच पूर्ण उमेदवार यादी सार्वजनिक करण्यात येणार असल्याचेही आघाडीने स्पष्ट केले.
