बदलापूर :- बकरी ईदच्या पार्श्वभूमीवर कुळगाव पोलिसांनी राबविलेल्या विशेष नाकाबंदी आणि कोंबिंग ऑपरेशनमध्ये मोठी कारवाई करत गावठी कट्टा, तलवार आणि धारदार चाकूंसह तिघांना अटक केली. या कारवाईमुळे बदलापूर, वांगणी आणि परिसरात खळबळ उडाली आहे.
कान्होर गाव हद्दीतील बदलापूर-कान्होर रोडवरील नागरिक मसाला कंपनीसमोर पोलिसांनी नाकाबंदी सुरू केली होती. त्यावेळी पोलीस उपनिरीक्षक यशवंत कदम यांना माहिती मिळाली की, दोन संशयित इसम बिगर नंबर प्लेट असलेल्या केटीएम ड्यूक मोटारसायकलवरून अग्निशस्त्र आणि घातक हत्यारे घेऊन जाणार आहेत. पोलिसांनी सापळा रचून मोटारसायकल अडवली असता आरोपी आलोक रामानंद यादव (रा. उल्हासनगर) याच्याकडून देशी बनावटीचे गावठी पिस्तूल, तर नितीन युवराज अहिरे याच्याकडून दोन धारदार लोखंडी चाकू जप्त करण्यात आले. पोलिसांनी दोघांना ताब्यात घेत मोटारसायकलसह मुद्देमाल जप्त केला.
या प्रकरणी कुळगाव पोलीस ठाण्यात आर्म्स ऍक्ट आणि महाराष्ट्र पोलीस अधिनियमांतर्गत गुन्हा दाखल करण्यात आला असून न्यायालयाने आरोपींना तीन दिवसांची पोलीस कोठडी सुनावली आहे. दरम्यान, गुन्हे प्रकटीकरण शाखेने वांगणी परिसरात कोंबिंग ऑपरेशन राबवत हिस्ट्रीशीटर अक्षय कवठे याच्या घरावर छापा टाकला. या कारवाईत तलवार आणि चाकू जप्त करण्यात आले असून स्वतंत्र गुन्हा दाखल करण्यात आला आहे.
ही कारवाई अप्पर पोलीस अधीक्षक अनमोल मित्तल, उपविभागीय पोलीस अधिकारी अनिल लाड आणि कुळगाव पोलीस ठाण्याचे प्रभारी अधिकारी शिवाजी ढवळे यांच्या मार्गदर्शनाखाली पार पडली. पोलीस उपनिरीक्षक यशवंत कदम, प्रदीप बोदडे, हवालदार बाबू पवार, पोलीस नायक सोमनाथ मोरे, सचिन जाधव, अविनाश वाकचौरे आणि नरेंद्र कोळी यांनी कारवाईत सहभाग घेतला. पुढील तपास पोलीस उपनिरीक्षक प्रितेश पाटील करीत आहेत.
