बदलापूर:कुळगांव-बदलापूर नगर परिषदेच्या निवडणुकीसाठी भाजपचे निवडणूक प्रमुख व माजी केंद्रीय राज्यमंत्री कपिल पाटील यांनी ८० हून अधिक इच्छूक उमेदवारांच्या आज मुलाखती घेतल्या. दरम्यान, केंद्र, राज्य स्तराप्रमाणेच स्थानिक पातळीवरही महायुतीने एकत्रित लढावे, या मुख्यमंत्री देवेंद्र फडणवीस यांच्या सूचनेनुसार शिवसेनेबरोबर युतीसाठी प्रयत्नशील आहोत, अशी माहिती निवडणूकप्रमुख कपिल पाटील यांनी दिली.
कुळगांव-बदलापूर नगर परिषदेच्या निवडणुकीनिमित्ताने पूर्वतयारीसाठी भाजपाचे प्रमुख पदाधिकारी, प्रमुख कार्यकर्ते आणि इच्छूक उमेदवारांची शनिवारी बैठक झाली. या बैठकीनंतर कपिल पाटील यांनी इच्छूक उमेदवारांच्या मुलाखतीही घेतल्या. या वेळी भाजपाचे जिल्हाध्यक्ष जितेंद्र डाकी, माजी नगराध्यक्ष रामभाऊ पातकर, माजी नगराध्यक्ष राजेंद्र घोरपडे, बदलापूर पश्चिम विभागाचे शहराध्यक्ष किरण भोईर, पूर्व विभागाचे शहराध्यक्ष रमेश सोळसे, माजी नगरसेविका रुचिता घोरपडे, माजी नगरसेवक संजय भोईर, शरद तेली, अण्णा कुलकर्णी, संभाजी शिंदे, शैलेश वडनेरे, बाळा घोरपडे, संजय भोई, भिवंडीचे माजी तालुकाध्यक्ष पी. के. म्हात्रे, मीनल मोरे आदींसह मान्यवर उपस्थित होते.
नगर परिषदेच्या निवडणुकीत एकमत झालेल्या प्रभागांमध्येही इच्छूकांनी उमेदवारी अर्ज भरल्यामुळे उमेदवारांची संख्या वाढली. राष्ट्रवादी कॉंग्रेसला सोडलेल्या प्रभागांमध्ये एक उमेदवार भाजपाचा असावा, अशी मागणीही काही कार्यकर्त्यांनी केली आहे. आता या मुलाखतींबाबत प्रमुख पदाधिकारी व कार्यकर्ते, लोकप्रतिनिधी आणि निवडणूक प्रमुख यांचे मत स्वतंत्रपणे लिफाफ्यात सादर केले जाईल. त्यानंतर लवकरच उमेदवारांची यादी जाहीर होईल, अशी माहिती कपिल पाटील यांनी दिली.
स्थानिक स्वराज्य संस्थांच्या निवडणुकीसाठी महायुतीतील मित्र पक्षांबरोबर शक्यतो युती करावी, अशा सूचना मुख्यमंत्री देवेंद्र फडणवीस यांनी दिल्या आहेत. त्यानुसार राज्यातील इतर नगर परिषदांप्रमाणेच कुळगांव-बदलापूरातही भाजपा युतीसाठी प्रयत्नशील आहोत. शिवसेनेचे शहरप्रमुख वामन म्हात्रे यांच्याबरोबर दूरध्वनीवर संपर्क साधून एकत्र चर्चा करण्याची सूचना केली आहे, असे कपिल पाटील यांनी स्पष्ट केले.
